Күзәтчелек советы оешты

Төп бурычы өлкән яшьтәге кешеләргә, авыр тормыш хәлендә калучыларга ярдәм итү, аларга көнкүрештә, медицина, психологик, педагогик, социаль-хокукый яктан булышу булган әлеге үзәк 2006 елда бюджет учреждениесе буларак оешса, 2010 елның маеннан ул автоном учреждение итеп үзгәртелде. Шул нигездә аның белән идарә итү ор­ганы булып Күзәтчелек советы һәм директоры санала. Әлеге утырышның беренче көн тәртибенә советның рәисен, рәис урынбасарын, секретарен сай­лау мәсьәләләре кертелгән иде. Аның составында җирле үзидарә органнары, милек хуҗалары, җәмәгатьчелек, "Өмет" үзәге вәкилләре бар. Утырышны социаль яклау бүлеге начальнигы Фатыйма Бикбова алып барды. Совет әгъзалары үз­лә­ренең рәисе итеп бертавыштан муниципаль район Советы аппараты җитәкчесе вазифаларын башкаручы Рамилә Айзатуллованы, урынбасары итеп район ветераннар Советы рәисе Әлфия Закированы, ә секретаре итеп "Бердәм Россия" партиясенең Кайбычтагы җирле бүлеге җитәкчесе Рушания Лотфуллинаны сайлады. Күзәтчелек советы "Өмет" үзәгенең Уставына үзгә­решләр кер­тү турындагы тәкъдимнәрне карый, финанс эшчәнлегенә күзәт­челек итә, акча керемнәренең максатчан файдалануын контроль­ли, еллык бухгалтерлык отчетына аудит үткәрү турында карар кабул итү һәм башка вәка­ләтләргә ия.

"Өмет" үзәге директоры Фәнис Гыйниятуллин 2011 елдагы бухгалтерлык отчетын килештерү, 2012 елга хуҗалык эш­чән­леге планы турында сөйләде. Әлеге үзәкнең өйгә килеп социаль ярдәм күрсәтү бүлеге мөдире Светлана Нуруллина тү­ләүле хезмәт күрсәтүләр­дән кергән акчаларның нинди максатларда тотылуы белән таныштырды. Бүгенге көндә 52 социаль хезмәткәр ярдәмгә мохтаҗ 62 кешене карый. Шуларның 51е үзләрен караган өчен пенсияләренең 25 процентыннан артмаган күләмендә тү­ли. Әгәр дә аларның пен­сиясе Татарстандагы яшәү минимумыннан (5001 сум) түбән булса, түләү­сез хезмәт күрсәтелә. Алар күп түгел - сигез ге­нә. Шулай ук өч Бөек Ватан сугышы ветераны бушлай социаль хезмәт ала.

Район Советы аппараты җитәкчесе вазифаларын башкаручы Рамилә Айзатуллова социаль хезмәт­кәр­ләргә нәтиҗәле хезмәт теләде.