Тырыш хезмәт нәтиҗәләр белән раслана
РФ Пенсия фондының Кайбычтагы идарәсенең еллык хисап җыелышы Татарстан Республикасы Пенсия фонды бүлекчәсенең социаль түләүләр бүлеге начальнигы Гөлсинә Сабирова, район башкарма комитеты җитәкчесе Алексей Макаров һәм бүлек начальниклары катнашында үтте.
Үзенең хисап чыгышында Идарә начальнигы Чулпан Камалиева коллектив эшчәнлеген чагылдыручы күрсәткечләргә тукталды. 2011 елда Кайбычта халык саны 14866 булган, шуларның 4863е - пенсия яшендәгеләр. Индексацияне дә кертеп, пенсиянең уртача күләмен 7337 сумга кадәр җиткерүгә ирештеләр. 56нчы Федераль Закон кысаларында өстәмә иминият кертемнәренең 795,4 мең сумга кадәр артуы 16 кешедән торган коллективның иминиятләштерелгән затлар белән килешеп эшләве турында сөйли. 256нчы Федераль Законны гамәлгә куюда да уңай нәтиҗә күзәтелә: закон үз көченә кергәннән бирле 470 кешегә Ана (Гаилә) капиталы алу өчен сертификатлар тапшырылган.
- Агымдагы елда капитал алучылар санын 500дән арттырырга уйлыйбыз, республикада бу сан 100 меңнән артачак. 212 гаиләнең капитал акчасын торак шартларын яхшырту өчен файдалануы безнең өчен дә шатлык, - дип билгеләп узды идарә начальнигы.
Максатларына ирешү юлында идарә хезмәткәрләренең тырыш һәм нәтиҗәле эшчәнлек алып баруына башкарма комитет җитәкчесе дә аерым басым ясады.
- Югары торучы органнарга мөрәҗәгатьләр саны да шуны ук дәлилли. Коллектив үзенең "Без һәр буын өчен ачык, һәркемнең бүгенгесен һәм киләчәген кайгыртабыз" девизына тугрылык саклап эшли. Территориаль орган белгечләре клиентларының һәр соравына җавап бирергә әзер, башкарма комитет хезмәтләре белән дә тыгыз мөгамәләдә эшлиләр. Шуңа күрә агымдагы елга куелган бурычларны үтәү коллективның көченнән килә. Иминият кертемнәренең тулылыгын һәм вакытында түләнүен тәэмин итү, район гражданнарының матди тәэмин ителү дәрәҗәсен үстерү буенча 2012 елга куелган бурычларны сыйфатлы итеп оештыру, гражданнарга түләүләрне оештыру чараларын гамәлгә кую, ведомствоара электрон документлар һәм мәгълүмат алмашуны тәэмин итү бурычлары куела идарә алдына, - диде ул.
Алексей Николаевич иң яхшы белгечләр дип табылган Марат Вәлиев белән Гүзәлия Сөнгатуллинаны район башлыгының Мактау грамоталары белән бүләкләде. Гөлсинә Сабирова идарә начальнигы Чулпан Камалиевага, белгечләр Талия Шәрәпова һәм Раминә Пашковага, машина йөртүче Ильяс Шакировка ТР буенча Пенсия фонды бүлекчәсе идарәчесенең Рәхмәт хатларын тапшырды.
Иң мөһим һәм кызыклы язмаларны Татмедиа Telegram-каналында укыгыз
