“Заволжье” игенчеләре уҗым бодае кырының һәр гектарыннан 25 центнер уңыш ала

Комбайнчылар арасында алдынгылыкны үз кулында тотучы Сергей Петров бу уракта да сынатмый. Кечкенәдән игенче һөнә­ре­нә кызыккан егет Федоровское урта мәктәбендә үк трактор белән идарә итү таныклыгы алып чыга. Механизатор булып эшли башлавына инде унбиш ел вакыт узып киткән.

- Игенче урак чорында вакыт белән хисаплашмый эшли ул. Иртән эшкә килүгә, комбайнны карап, майлап чыгабыз да, кырда эшли башлыйбыз. Караңгы төшкәч кенә туктыйбыз эштән. Сменага 15-20 гектар мәйданда эш башкарабыз. Яңгырлар яумаса, без сынатмыйбыз, анысы. Урып-җыюга кадәр үсемлекләрне корткычлардан, төрле авырулардан саклауда эшләдем. Кырлар бушап калгач, көзге чәчүдә катнашам, - ди Сергей.

Аның ярдәмчесе, ветеринария техникумында белем алучы Илһам Кәримовның уракта беренче сезоны. Егетләр урак башыннан барлыгы 3317 центнер ашлык суктырып өл­гер­гән. Эш күләме шактый әле. Комбайнчыларга куелган төп бурыч - күләм артыннан кумыйча, эшне сыйфатлы итеп башкару.

Урып-җыю кампаниясен вакытында төгәлләргә бө­тен мөмкинлекләр дә тудырылган биредә. Җәм­гыять кырларында җитештерүчәнлеге югары булган унҗиде комбайн эш­ли. Бункерлар тулгач, берсе дә туктап тормый, һәр комбайнга бер "КамАЗ" туры килә. Җәмгыять буенча һәр гектардан 25 центнер уңыш алына. Ашлыкны Колаңгыдагы ашлык кабул итү пунктына ташыйлар.

- Урып-җыю кампаниясе башланганчы уракта катнашачак барлык техника ремонтланды, махсус ремонт бригадасы төзелде, әлегә техниканың сафтан чыкканы юк. Хәзерге вакытта безнең бар көч бөр­­­­теклеләрне урып-җыюга юнәлдерелгән, күпьеллык үләннәрне икенче катка уруны да төгәлләдек. Азык культураларыннан 469 гектар мәйданда кукуруз гына җыеп аласы калды, - ди директорның үсемлекчелек буенча урынбасары Илнур Сәлахов.