Көмеш чәчле чор

Әлеге тантанага районның барлык авыл җирлекләреннән дә ветераннар Советлары рәисләре, сугыш һәм хезмәт ветераннары, авыл җирлек­ләре башлыклары чакырылган иде. Араларында атказанган терлекчеләр - Кошманнан Мөслимә Җә­ләлиева, Чүтидән Минхәят Хәйретдинова, Бортастан Дамира Насыйбуллина, Кошманнан атказанган механизатор Габделхак Нәфыйков, ветеран-укытучылар - Олы Кайбычтан Мәүлиха Айзатуллина, Ләбибә Шәмсетдинова, Әлфия Закирова, Гөлнур Кәлимуллина, Ро­за Мартынова, Кошманнан Мансур Шәрәфиев, Фәрит Авзалов, Надеждинодан Валентина Утопова, Зур Подберезьедан Луиза Кувшинова, Валентина Кошкина, Екатерина Елисеева, Иске Тәрбит­тән - Галина Семенова, Борындыктан Әлфия Гый­мадиева, Фәй­рүзә Фатыйхова, Рузалия Мөхәммәт­җанова да бар. Өлкәннәр бәйрәменә "Ана даны" медаленә лаек булган күп­балалы аналарның да чакырылуы буыннар алмашының матур бер үрнәген чагылдырды. Иске Чәч­кабтан Минзилә Галләмова, Байморзадан Засима Молчанова, Кыр Буасыннан Галина Полякова, Иске Буадан Рита Ивановалар әнә шундый аналар. Симәкидән Бөек Ватан сугышы ветераны Ни­колай Зайцев беләнн таныштырганда, зал аны алкышларга күмде.

Тантана муниципалитет җитәкчесе Җәү­дәт Гаффаровның котлау сүз­ләре бе­лән башланып китте. Ул өлкәннәргә мө­рәҗә­гать итеп:

- Календарегызда, хөр­мәтле ветераннарыбыз, хәзер "көмеш чәчле" чор. Әм­ма хафалану-борчылуга сәбәп була алмый бу. Тормыш ыгы-зыгысына алмашка узганнарның сабакларын барлауның, балаларыгыз, оныкларыгыз белән тормыш шатлыгы серләрен уртаклашуның яңа чоры килүен генә аңлата бу. Сез Ватаныбызны данлаган һәм яклаган кешеләр, сезнең кылган эш-гамәлләрегез өчен рәхмәтемне белдерәм, - диде.

Районда биш меңнән артык пенсионер яши. Бөек Ватан сугышы ветераннары һәм аларның тол калган хатыннарының торак шартларын яхшырту юнәлешендә 232 ветеран торак белән тәэмин ителде. Өлкәннәр турында кай­гыртуның киләчәктә дә өстенлекле юнәлеш булачагы кызыл җеп булып ятты.

Бәйрәм булган җирдә җыр-биюсез булмый. Татарстанның халык ар­тист­ка­сы, якташыбыз Лидия Әх­мәтова һәм аның укучылары куйган концерт кү­ңел­ләргә хуш килде.