Май чабу – күңелле чара
Күптәннән килгән матур гадәт буенча, февральнең соңгы якшәмбесендә авылыбыз халкы кышны озатты. Билгеле, озакка түгел, чөнки ел ахырында ул кабат кайтачак. Көн шактый салкын, җилле булуга карамастан, бәйрәмгә халык күп җыелган иде.
Кышны озату, Май чабу - күңелле чара, шуңа күрә халык күп җыела, аеруча балалар. Авыл мәдәният йорты хезмәткәрләре үзешчәннәр, мәктәп укучылары белән берлектә концерт программасы күрсәттеләр, ә биюләрдә күпчелек халык катнашты. Чөнки мондый һава шартларында хәрәкәтләнү туңмаска ярдәм итә. Авыл кулланучылар җәмгыяте хезмәткәрләре халыкка кайнар чәй, тәмле коймак, башка кондитер әйберләре тәкъдим итте.
Бизәлгән, җигүле атлар хуҗалары Алексей Лебедев, Артур Козлов балаларның күңелен күреп, аларны ат чанасына утыртып йөрде. Балалар өчен төрле уеннар, күңелле чаралар үткәрелде. Бәйрәм кышның символы булган карачкыны яндыру белән төгәлләнде.
Клуб мөдире, матур җырлар башкаручы Александр Бичарин, китапханәче Нина Маланьева авылдашлары өчен бик күңелле бәйрәм оештырды. Гомумән алганда, бәйрәм халык күңеленә хуш килде.
Следите за самым важным и интересным в Telegram-каналеТатмедиа
Нет комментариев