Җанга сихәт биргән очрашу

Казан шәһәрендәге Кол Шә­риф мәчетенең имам-хатыйбы Рамил хәзрәт Юныс белән очрашуга районыбызның барлык мөселман авылларыннан да кеше бик күп килгән иде. Алар арасында мә­чет картлары гына түгел, ур­та буын вәкилләре дә, яшьләр дә күп булды. Халкыбызның иман юлына басуын, әх­лагыбызны, иманыбызны баетучы вә­газьләр тыңларга сусавын күрсәтүче күркәм кү­ренеш түгелме бу?! Район башлыгы Җәү­дәт Гаффаров мондый очрашуларны ай са­ен үткәрү тәкъдиме белән чыкты.

Өч сәгатькә якын вәгазь тыңлау берәүне дә ялыктырмады, әле аннан соң да Рамил хәзрәтне сорауларга күмделәр. "Мө­сел­ман кызлары җырларга тиешме?" дигән сорауга ул болай дип җавап бирде:

- Минем кызым Хәдичә мәктәпкә җырлап бара, җырлап кайта. Өйдә дә гел көйләп йөри. Баланың күңеленнән моң агыла икән, мин ул моңны ник тыярга тиеш соң әле? Сәләт тә Аллаһы Тәгаләнең кешегә биргән зур бүләге ул. Кызым "Җыр­лы-моңлы балачак" бәй­гесендә катнашып, җиңү яулады. Әгәр дә кеше мәгъ­нәле җыр тыңлый икән, аның бернинди дә зыяны юк, киресенчә, ул зәвык тәрбияли.

Баксаң, Рамил хәзрәтнең нәсел җепләре опера сәх­нәсе йолдызы Галия Кай­бицкая, Мотыйгулла хәз­рәт нәселенә барып тоташа икән. Үзе дә моңлы тавышы белән сокландырды ул Кайбыч халкын.

Очрашуда халкыбызны әдәпле, бер-береңә ихтирамлы, ярдәмчел булырга, ата-ана, туганнарны, балаларны хөрмәт итүгә чакырган вәгазьләр яңгырады.