Мәүлид безне бергә җыйды

Бәйрәм табыны артында узган бу очрашуда Мө­хәм­­мәд пәй­гамбәрнең тормышында булган төр­ле вакыйгалар, аның әдәп-әхлагы турында сөй­ләштек. Килгән кунаклар да үзләре китаплардан укыган һәм әзер­ләп кил­гән хәдисләрен сөйләде. Олы Кайбыч авылында озак еллар укытучы булып эшләгән Ләбибә апа Шәмсетдинова берсен­нән-берсе матур эчтәлекле сиксәннән артык хәдис язып алып килгән иде. Мөхәммәдия мәдрәсә­сендә укучы апаларыбыз да хәдисләр, аларның төрләре турындагы белемнәре белән уртаклашты. Җомгага йө­рү­че ир-егетләребез дә бу кичә­дән бик канәгәть булды, белгән сүрәләрен укып, хәер-догалар кылып, вә­газьләр тыңлады. Ә балалар бу кичәдә, бәйрәм өстәлендә сыйланып, үзара ярышлар оештырып, истәлекле бүләк­ләргә ия булды.

Хөрмәтле газета укучыларабыз! Без елдагыча шу­шы Мәүлид айларыбызда сезнең белән пәйгамбәребез Мөхәммәд мостафа саллалаһу гәләйһи вәсәлләмнең тормышын өйрәнүгә багышлап сорау-җавап бәйгесен оештырабыз. Бу конкурста катнашучыларга һәм җи­ңү­челәргә бүләкне 8 февраль көнне 18:00 сә­гаттә Олы Кайбыч авылы мәдә­ният йортында вә­газъ кичәсендә тапшырачакбыз. Анда барлык райондашларыбызны да көтеп калабыз.

1. Пәйгамбәребез ничә яшендә һәм кемгә өй­ләнә?

2. Пәйгамбәребезнең ничә баласы була? Аларның исемнәре.

3. Пәйгамбәребезгә вахины китерүче фәреш­тә.

4. Пәйгамбәребезгә иң беренче иңгән аятьләр.

5. Коръәни Кәримнең кай­­­сы сүрәсендә Аллаһы Тәгалә пәйгамбәребезгә "мин сине ташламадым һәм ачуланмадым" ди.

6. Кайсы шәһәрдән пәй­гамбәребезне ташлар белән куалар?

7. Кайгы елында пәй­гамбәребез ике якын кешесен югалта. Алар кем­­­­нәр?

8. Мөселманнар белән Мәккә мөшрикләре арасында нинди солых тө­зелә? Исеме, һиҗри ел белән вакыты.

Бу сорауларга җавапны сез почта аша язмача хәбәр итә аласыз. (422330, ТР, Кайбыч районы, Олы Кайбыч авылы, Үзәк урам, 77, Олы Кайбыч мә­чете).

Районыбыздагы авыл-мәхәлләләрдә дини дә­рес­ләр алып баручы апа­ларыбыз Иске Чәчкаб авы­лы имам-хатыйбы Фир­дүс Шаһиев хәзрәт җитәк­челегендә 28 гыйнварда Казандагы Г.Камал театрында пәйгамбәребез Мө­хәммәд истәлегенә багышланган кичәдә катнашып, вәгазьләнеп кайтты.

Әлеге чараны оештыручы Татарстан Диния нә­за­рәтенә һәм кичәгә барырга ярдәм итүче районыбыз җитәкчелегенә олы рәхмәтебезне белдерәбез. 3 февраль якшәмбе көнне иртәнге сәгать унбердә Олы Кайбыч авылы мәдәният йортында да укучы балалар, әти-әниләр, әби-бабайлар өчен пәйгамбәребез истәлегенә багышланган кичә уздырыла. Рәхим итегез!