Иске Чәчкабтан Зәйтүнә апа бер гасырга якын гомер яши

Зәйтүнә апа Кече Кайбыч кызы. Яшьлеге шушы авылда үтә. Хәер, яшьлекнең сүзе генә матур аның, чынлыкта яшь кызның матур яшьлеге дәһшәтле сугыш елларына туры килә. Күп хатын-кызлар белән бергә окоп казырга чыгып китә ул. Кышкы буранмы, зәмһәрир суыкмы, исәпләшеп торыш юк, урман кисәргә дә, таш чыгарырга да туры килә аларга. Нечкә билләрнең ныклыгы авыр хезмәттә сынала ул елларда. Менә Зәйтүнә апаның тормыш альбомыннан бер хатирә. Сугыш беткәннән соң, Зәйтүнә апаны авыл советы рәисе авылга алып кайта. Кәнүшнигә атлар карарга куялар аны. «Кәнүшнине ачып керсәм, атларның беришен дилбегә белән аратага бәйләп куйганнар, калганнары җирдә ята. Сугыш вакытында ачлы-туклы эшләп өшәнгәннәр, җаннарым. Суны ерактан ташыйсы, атларны карыйсы, тәрбиялисе бар», - дип хатирәләрен барлый Зәйтүнә апа. Көне-төне атлар янында була яшь кыз. Чәчүгә чыкканчы 14 атны аякка бастыра бит, тәки! Колхоз кырларында эшләрлек булып көч җыя малкайлар.

Ә колхоз кырлары киң, атларга гына ышанып торып булмый. Кызлар да иңбашларына сука киеп җир сукалый Атлар белән бергә кызлар да гектарлап җир эшкәртәләр, дигән җөмләне язганда күзләргә яшь килә... Менә кемнәр ул Ил кызлары, Хезмәт батырлары! Менә кемнәр безгә тынычлык, иминлек бүләк итүчеләр!

Ә Зәйтүнә апа үзе шактый тыйнак әби. Бер генә зарлану сүзе дә ишетмәдем. Начарын күп күргәнгәдер инде, бүгенге тормышка шөкер итә ул, булган һәр нәрсәгә рәхмәт әйтә. Әнә, район башлыгы бүләген тапшыргач та, РФ Президенты Владимир Путин открыткасын (Зәйтүнә апа исемен язып махсус җибәрелгән!) кулына алгач та күз яшьләрен тыя алмады ул. Шөкер, тормыш авырлыклары инде күптән артта калган, бу күз яшьләре дә шатлыктан, искә алуларына, белеп торуларына ихлас куанудан гына иде! Оныкларыгызның, балаларыгызның, алай гына да түгел, районыбызның куанычы, горурлыгы булып, исәнлектә озак яшәгез әле, яме, Зәйтүнә апа!