Кайбыч районында чөгендер ала башладылар
Игенчеләр, бөртекле культураларны урып-җыеп бетерүгә, шикәр чөгендере ала башладылар. Эш күләме шактый зур: 2350 гектар мәйданда эш башкарасылары бар. Чөгендер алуга иң беренче булып "Ак Барс Кайбыч" җәмгыятенең беренче филиалында ("Заволжье") -Борындыкта керештеләр.
Борындыкның уңдырышлы туфрагында татлы чимал 733 гектар мәйдан били. Калган чөгендерләре Колаңгы һәм Бортас авыллары янындагы басуларда үсә. Борындыкта елга буендагы кырларда уңдырышлылык һәр гектардан 420-430ар центнер тәшкил итә. Бу - бик югары уңыш! Район башлыгы Альберт Рәхмәтуллин шикәр чөгендере гектарыннан 300 центнердан югарырак уңыш бирсә, алдагы елларда да бу культура белән ныклап шөгыльләнергә мөмкин икәнлегенә басым ясады. Ә инде уңдырышлылык түбән икән, зур чыгымнар түгеп, гектарлар артыннан куудан ни мәгънә? Кайбычта гомер-гомергә чөгендер иктеләр, хәзер дә хуҗалыкларга югары табыш китерүче бу культурага игътибар кимеми. "Ак Барс Кайбыч" җәмгыятенең беренче филиалында аны быел 890, икенче филиалы "Алтын кырларда" - 960, "Гөбенә"дә 500 гектар мәйданда үстергәннәр.
Җәмгыятьнең куркынычсызлык хезмәте начальнигы, шикәр чөгендере алу буенча җаваплы Наил Гаязетдинов әйтеп узганча, Борындыкта чөгендер берничә басуда үсә, бу филиалда уңдырышлылык әлегә уртача 400 центнер.
Басуда куәтле техника - Каратундагы машина-трактор комплексыннан килгән биш "Ropa" чөгендер алу комбайны, бер "Maus" төягече эшли. Комбайннар 300 гектарга якын мәйданда татлы тамыр алырга өлгергән. Хәзерге вакытта барлыгы 10880 тонна татлы тамыр өемнәргә салынган. Бер көн эчендә комбайнчылар 2144 тонна чөгендер чыгарган, шуның 790 тоннасы Буа шикәр заводына озатылган.
- Аяз көннәрдә тәүлек буена бер комбайн 25 гектар мәйданда эш башкара ала. Бездә эш тәүлек әйләнәсе оештырылган. Һәр смена 12шәр сәгать эшли. Мин төнге сменада, алмашчым Рошаль Дункай - көндезгедә. Аннан соң сменаларны алмашабыз. Чөгендер алу комбайнында унынчы сезонымны эшлим. Рошаль белән беренче елын гына эшлибез әле. Июль ахырларында ук комбайнны ремонтлап, бөтен узелларын тикшереп чыктык, техника сынатмаска тиеш, - ди Федоровскоеда яшәүче Илһам Нотфуллин.
Илһам чөгендер алуга керешкәнче җәмгыятьтә "КамАЗ"да шофер булып эшләгән. Рошаль Апас аграр көллиятендә механизатор һөнәрен үзләштерә, хәзер практикада икән. Тәҗрибәле остаз эләккән аңа. Көзге көннәр әлегә яңгырсыз. Шуңа да шикәр чөгендере алу темпларын тизләтү зарур.
Следите за самым важным и интересным в Telegram-каналеТатмедиа
Нет комментариев