Кайбыч Сабантуенда җиңүгә ирешкән көрәшчеләр белән таныштырабыз
Келәмдә көрәшне 36 килограммга кадәр үлчәү авырлыгындагы иң яшь спортчылар башлады.
Кече Мәме авылыннан Алексей Владимиров иң көчлесе булып чыкты. Кошманнан Шәфкать Фәйзуллин - икенче, Кече Мәмедән Кирилл Козин өченче урында.
45 килограммга кадәрге үлчәү авырлыгында Кече Кайбыч авылыннан Ранил Абдуллинга тиңнәр табылмады. Ул, барлык көндәшләрен сыртларына салып, җиңү яулады. Иске Тәрбиттән игезәкләр Александр һәм Николай Демьяновлар - икенче-өченче урыннарда.
55 килограммга кадәргеләр арасында җиңүчеләр: Мәлкидән Антон Галкин, Кече Мәмедән Дмитрий Майданов, Владислав Филлипов.
60 килограммга кадәргеләр арасында җиңүчеләр: Мәлкидән Константин Лутцев, Кече Кайбычтан Илнур Хикмәтуллин, Кошманнан Руслан Гарипов .
60 килограммнан югары үлчәү авырлыгында Кече Мәмедән Владимир Ворожейкин иң көчлесе иде. Ул укучылар арасында 2014 елгы Сабан туеның абсолют батыры исемен алды һәм төп приз - тәкәгә дә лаек булды. Кече Кайбычтан Ильмир Гашыйгуллин, Мәлкидән Василий Воробьев икенче-өченче урыннарда.
65 килограммга кадәргеләр арасында көрәшкән Олы Кайбыч егете Марсель Сәйфуллин, Кече Мәмедән Валерий Фомин, Олы Кайбычтан Зөлфәт Әхмәтҗанов беренче-өченче урыннарда.
75 килограммга кадәр үлчәү авырлыгында Мәлкидән Артур Козловка тиңнәр булмады. Яшел Үзәннән килгән кунак егете Рөстәм Хәсәнов икенче урынга чыкты. Өченче урынны Иске Тәрбиттән Алексей Иванов алды.
85 килограммга кадәрге үлчәү авырлыгында беренче урын өчен узган елгы Сабан туеның абсолют батыры Николай Горшков һәм Олы Кайбыч егете Наил Гарәфетдинов арасында кискен көрәш барды. Шулай да Николай өстенрәк булды. Өченче урында Кече Мәмедән Вениамин Киселев.
85 килограммнан югары үлчәү авырлыгында көрәшүче егетләргә җиңүчене ачыклау өчен озак бил алышырга туры килде. Шулай да, Яшел Үзәндә яшәүче Кошман егете Хамис Миңнуллин өстенрәк булып чыкты. Икенче урынны да Яшел Үзән районының Мамадыш-Әкил авылы егете Илнур Хәялиев алды. Өченче урында - Казаннан Данис Әсхәдуллин.
2014 елгы Сабан туеның абсолют батыры исеме өчен узган елгы батыр Николай Горшков белән яшь егет Марсель Сәйфуллин көрәште. Николай өченче ел рәттән район Сабан туеның абсолют батыры исемен яулады. Җиңүчеләргә, призлы урыннарга чыгучыларга бүләкләрне район башлыгы Альберт Рәхмәтуллин тапшырды.
Следите за самым важным и интересным в Telegram-каналеТатмедиа
Нет комментариев