Кайбычлылар “Яшел Россия” акциясендә катнаша

Әлеге экологик акциянең максаты - туган җиребезне тагын да матурлау, гөлбакчага әйләндерү. Безнең Кайбыч районында экологик мәсьәләләргә аеруча зур игътибар бирелүен барыбыз да тоя. Агач утырту, санитар чистарту өмәләре әледән-әле үткәрелә. Әле алай гына да түгел, Олы Кайбыч урамнары хәзер чәчәкләргә төренде. Баганаларга да петуния чәчәкләре утыртылган вазалар эленде. Татарстан Премьер-министры Илдар Халиков та Кайбычка килгәч, ул чәчәкләрнең тирә-юнебезгә ямь биреп утыруына, районыбызның төзек-чиста булуына игътибар итте. Ә район башлыгы Альберт Рәхмәтуллин киләчәктә барлык авыл җирлекләрен дә шулай чәчәкләргә төрү бурычын куйды.