Кошман авыл җирлеге башлыгы Лилия Сафина Волгоградтан кайтты

Россия авыл җирлекләре депутатлары катнашында узган съездда әлеге фи­кер кызыл җеп булып ятты. "Бердәм Роcсия" партиясенең Югары Советы һәм Генераль Советының киңәйтелгән утырышы кысаларында Волгоградта 4-5 апрельдә узган бу форумда Кошман авыл җирлеге башлыгы Лилия Сафина да катнашты.

- Татарстан делегациясе составына мине дә кертүләрен белгәч, гаҗәпләнүемнең чиге булмады. Безнең республикадан анда унике генә кеше кат­нашты бит. Алар арасында "Бер­дәм Россия" сәяси партия­сенең Татарстандагы тө­бәк бүлеге секретаре Фә­рит Мөхәм­мәтшин, "Бер­дәм Россия" партиясенең төбәктәге башкарма комитеты җи­тәкчесе Андрей Кондратьев, журналистлар һәм без - Алексеевский, Азнакай, Чирмешән, Кайбыч районнарының авыл җир­лек­ләре башлыклары бар иде. Илебезнең төрле поч­мак­ла­рыннан җыелган ике мең­нән артык делегат катнашында узган бу съездда бөтен ил игътибары авыл проблемаларына юнәлдерелде дисәк, һич ялгыш булмас, - диде авыл җирлеге башлыгы.

Лилия Сафинаның делегатлар арасында булуы бер дә очраклылык кына түгел: ул җитәкләгән Кошман авыл җирлеге рейтингта беренче урында бара. Съездның беренче көнендә депутатлар, алты мәйданга бүленеп, авылларга хас төп проблемалар - юллар, мәгариф, мәдәният учреждениеләре төзү һәм башка мөһим мәсьәләләр буенча фикер алышкан. Турыдан-туры диалог формасында узган бу сөйләшүдә авыл җирлекләре депутатлары, агробизнес вәкилләре, социаль проектлар җитәкчеләре Россия министрлары һәм Дәүләт Думасы депутатлары бе­лән аралаша. Съездда кат­нашучылар аларга авыл хуҗалыгы һәм авыл тормышына кагылышлы сорауларын бирә.

- Волгоградка барганда Татарстан районнарындагы хезмәттәшләрем бе­лән аралаштык, эшчәнлегебез турында сөйләштек. Ә съезд кысаларында башка төбәкләрдәге авыл җирлекләре башлыклары белән тәҗрибә уртаклаштык. Ул аралашулардан соң шуны аңладым: безнең республикада тормыш шартлары күпкә яхшырак, инфраструктура да үсеш алган. Россиянең авыл хуҗалыгы министры Николай Федоров чыгыш ясаганда без барыбыз да үз төбәгебез өчен горурланып утырдык. Үз чыгышында ул бер­ничә тапкыр "бай Татарстан" дип кабатлады. Чыннан да, республикабызда төрле федераль программалар уңышлы тормышка ашырыла, күп кенә пилот проектлар нәкъ менә бездә "имтихан" уза, - диде Лилия Сафина.

Кошман авыл җирлеге башлыгы алтынчы мәй­данга эләгә. Анда авыл хуҗалыгына кагылышлы дәүләт программаларының аграр сәнәгать комплексы үсешенең нигезен тәшкил итүе хакында кызып-кызып фикер алышалар. Әңгәмә Волгоград янындагы Волжск шәһә­ренең "Овощевод» теплица хуҗалыгы базасында уза.

- Төрлебез төрле төбәк­ләрдән булсак та, безне уртак проблемалар борчый. Сорауларның күбесе авыл хуҗалыгы кредитларына субсидияләр түләү, мелиорацияне үс­терү, дәүләт ярдәме чаралары турында иде. Яшь­ләрне авылда калдыру, анда яшь кадрларны җәлеп итү барыбызны да борчый. Мәйданнарда фи­кер алышулар нәтиҗәләре буенча икенче көнгә план билгеләнде. Бу көн­не съезд Россия Хөкү­мә­те рәисе, «Бердәм Россия" партиясе лидеры Дмитрий Медведев чыгышы белән башланып китте, - дип әңгәмәбезне дә­вам итте Лилия Сафина.

Волгоградтагы спорт сараенда узган пленар утырыш съездның иң югары ноктасы була. "Авылны үстерүдә "Бердәм Россия" партиясе әгъзаларына зур җаваплылык йөк­ләнә, чөнки безнең сафларда торучыларның һәр дүртенчесе авыл җирлегеннән", - дип белдерә үз чыгышында Дмитрий Мед­ведев. Ул авыл белән бәй­ле ике мәсьәләне кичекмәстән хәл итү бурычын куя: авыл җирендә тормышны тагын да уңайлырак, аграр секторны көндәшлеккә сәләтле итү. Утырышта да шушы проблемаларны хәл итү хакында сүз алып барыла.

- Дмитрий Медведев, Россиядә икътисади хәл­нең бик үк җиңел булмавына да карамастан, бер генә аграр программаның да туктатылмаячагын белдерде. Сөт җитеште­рү тармагына аеруча зур ярдәм булачагын әйтте, - диде съезд делегаты. - Авылларга ярдәм итү "Бердәм Россия" партиясе өчен алга таба да өс­тенлекле мәсьәлә булып калачак. Аграрийларга күрсәтелүче ярдәм чаралары, кече эшмәкәрлекне үстерү, балалар бакчалары, мәктәпләр, спорт корылмалары төзү, тө­зек­ләндерү буенча бездә максатчан эш алып барыла. Федераль һәм республика программалары ярдәмендә Кайбыч районында да модульле фельд­шер-акушерлык пунктлары, мәдәни үзәк­ләр сафка баса, юллар тө­зелә, ремонт эшләре алып барыла. Бу программалар киләчәктә дә гамәлдә булачак. Дмитрий Медведев чыгышыннан күренгәнчә, "Балалар спорты" партия проекты кысаларында авыл мәк­тәпләрендәге спортзалларга ремонт үткәрелә. Бу максатка ике миллиард сум акча бүлеп бирелә. "Авыл табибы" программасы буенча соңгы ике елда авылларга 12 меңнән артык врач кайткан. Программа тагын да камилләшәчәк: врачларны эшче поселокларга да җибәрә башлаячаклар. Өстәвенә, медицина университетлары тәмамлап кайткан яшь белгечләрне генә түгел, инде тәҗрибә туплаган врачларны да авылга җәлеп итмәкче булалар. Шуңа да бу программада катнашучы табибларның яшен 35 тән 40, 45 яшькә җиткерергә уйлыйлар. Россия Премьер-министры Дмитрий Медведев авылларга юллар төзү буенча федераль программада катнашу шартларының да сыгылмалы булачагын ышандырды. Ул мәктәпкәчә яшьтәге сабыйларны балалар бакчаларына автобусларда илтеп кую мәсьәләсе каралуын да әйтте. Әйе, дө­рес, авылда яшәүчеләр бөтен илне ашата, шул ук вакытта авылга озак вакытлар игътибар булмады.

Лилия Сафина белән ил тоткасы булган авылларның киләчәге турында озак сөйләшеп утырдык әле. Шунысы бәхәссез: Хөкүмәт югарылыгында шулай зурдан кубып сөй­ләшүнең нәтиҗәсе, һичшиксез, булачак.