Кошман егете солдат формасын салуга форумда булып кайтты

Әлеге форумга дөньяның төрле кыйтгаларыннан егет-кызлар җыелды. Алар арасында Кошман авылы егете Динар Гатауллин да бар иде. Мәктәптә укыган елларында ук милли көрәштә катнашып, җиңүләр яулап килгән егет, югары уку йортында спорт факультетын тәмамлаганнан соң, Россия Кораллы Көчләре сафларына алынды. Әле июнь аенда гына армиядән кайткан Динар форум эшендә дә актив катнашты. Форумга җыелган яшьләр Казанның тарихи урыннарында булды, татар халкының күренекле кешеләре белән очрашты, туган телебезне, гореф-гадәтләребезне, мәдәниятебезне саклау турында фикер алышты, бер-берсе белән аралашты, дуслашты. Бөтендөнья татар яшьләре форумы рәисе итеп кабат Бөтендөнья татар конгрессы башкарма комитеты әгъзасы Тәбрис Яруллинны сайладылар.