Кайбыч таңнары
  • Рус Тат
  • Кайбычлылар 14 сентябрьдә киләчәгебез өчен тавыш бирергә әзер

    14 сентябрьдә, республикабызда мөһим вакыйга көтелә: Татарстан Республикасының бишенче чакырылыштагы Дәүләт Советына депутатлар сайлау булачак. Бөтен республика күләмендә әһәмиятле вакыйга башланырга санаулы сәгатьләр калып бара. Сайлауга ничек карыйсыз? 14 сентябрь, гомумән, сезнең өчен нинди көн ул? Газета укучыларыбызга әнә шундый сораулар белән мөрәҗәгать иттек.

    Гөлнара Сафиуллина, Кайбыч район үзәк сырхауханәсе баш табибы урынбасары:

    -14 сентябрьдә булачак сайлау - республикада яшәүче һәрбер кеше өчен, чыннан да, мөһим вакыйга. Чөнки без киләчәгебезне сайлыйбыз. Бүгенге тормышыбыздан мин бик канәгать - күгебез якты, көннәребез тыныч. Районыбыз бик күп күрсәткечләр буенча республикада әйдәп баручылар рәтендә. Тормышыбыз тотрыклы һәм имин булсын өчен, хөкүмәтебез барсын да эшли. Кем өчен тавыш бирәсебезне инде төгәл беләбез һәм сайлауга иң беренчеләрдән булып барачакбыз.Татарстанда яшәүче һәр кеше, якшәмбе көнне сайлау участогына килеп, үзенең сайлау хокукыннан файдаланырга, шулай гражданлык позициясен күр­сәтергә тиеш.

    Гөлинә Габдрахманова, Олы Кайбыч мәктәбе укытучысы:

    - Кайбыч яшьләренең сайлауларда актив катнашачакларына ышанычым зур. Алар арасында лидерлык сыйфатларына ия булучылар күп, шуңа да үзләре ар­тын­нан иптәшләрен дә ияртсеннәр иде. Бөтен кеше дә лидер булып бетә алмый, әмма алар хезмәт урыннарында менә дигән хезмәткәрләр, уку йортларында тырышып белем алучы студентлар, спортчылар, эш­мәкәрләр, гап-гади авыл хезмәтчәннәре. Сайлауларда барыбызның да тавыш бирүе мөһим.

    Светлана Чернова, Олы Урсак, пенсионер:

    - Сайлауга гомер-гомергә җитди карадык. Монысын да көтеп торабыз. Сайлау алды агитациясе бик көчле булды. Депутатлыкка кандидатлар турында үзебезнең район газетасыннан күп укыдык. Аерым газеталар да китерделәр. Мәктәптәге сайлау участогына тө­шеп, тавыш бирәчәкбез. Бу вакыйгадан бары тик яхшыны гына көтәбез, яхшыга өметләнәбез. Барыбыз бердәм булып, катнашыйк, республикабыз, Кайбычыбыз тагын да алга китсен.

    Альбина Лебедева, «Кайбыч таңнары» газетасы редакциясенең система администраторы:

    - Хәтерлим әле, әти-әниебез сайлауга бәйрәмгә барган кебек бара иде. Ник икәнлеген кечкенә чакта аңлап бетермәсәк тә, сайлауның кирәкле һәм зур эш икәнлеген белеп үстек. Унсигез яшем тулгач, беренче мәртәбә сайлауга барганымны әле дә булса яхшы хәтерлим. Ул сайлау Корноуховода булды. Бүләк тә биргәннәр иде әле. Инде хәзер үзебезнең ике балабыз үсеп килә. Без аларның киләчәге якты булуын телибез. Шуңа күрә дә сайлауга барыргамы-юкмы дигән уебыз юк. Әлбәттә, барачакбыз һәм, чын мәгънәсендә, эш күрсәтә торган, Кайбычыбызны тагын да ямьлерәк, уңайлырак итәргә ярдәме тиярдәй кеше өчен тавыш бирәчәкбез.

    Гөлсинә Шакирова, техник-инвентарьлаштыру бюросы технигы:

    - Безнең бер генә сайлауга да бармыйча калганыбыз юк. Гаиләбездә дүрт сайлаучы: каенатам Биктимер, каенанам Рания, тормыш иптәшем Ильяс һәм мин. Улыбыз Булатка 16 сентябрьдә 18 яшь тула, ике көн алданрак туган булса, ул беренче сайлаучы булыр иде. Әле аны алда бик күп сайлаулар көтә. Кызыбыз Илсинә 7 класста укый. Без үзебезнең сайлау участогына гадәттә иртә белән үк, йорт эшләренә тотынганчы ук барабыз. Кемнәр өчен тавыш бирәчәгебезне дә беләбез. Безнең ки­ләчәктә дә тотрыклы, гүзәл Татарстанда яшибез килә. Бар теләгем: илләр тыныч булсын, балалар бәхетле булып үссен!

    Әлфия Закирова, район ветераннар Советы рәисе:

    - Татарстан халкы өчен мөһим булган сайлаулар көнендә мин Кайбыч ра­йонында яшәүче барлык пенсионерларны сайлауларда актив катнашырга чакырам. 14 сентябрьдә без Татарстан Дәүләт Со­ветының яңа составын сайлыйбыз. Безнең республика - икътисади һәм cо­циаль проблемалар уңышлы, нәтиҗәле хәл ителә торган төбәк. Ул Рос­сия күләмендә лидер, абруе зур. Шуңа да инвес­тицияләр дә ныграк җә­леп ителә, ә бу республиканың икътисади яктан үсе­ше өчен зур этәргеч. Татарстан - милләтләр дуслыгының ачык мисалы һәм без, өлкән буын кешеләре, тынычлыкта яшәвебез белән чиксез горурланабыз. Сугыш чо­ры авырлыкларын үз җил­­кәләрендә татыган сугыш һәм хезмәт ветераннары, тыл хезмәтчәннәре өчен бу бик мөһим. Хезмәт, га­илә, Ватанга мәхәббәт - Татарстан, шул исәптән Кайбыч халкының төп ру­хи кыйммәтләре әнә шулар. Без, ветераннар, даи­ми рәвештә Хөкүмәтебез кайгыртуын тоеп яши­без. Пенсия вакытында бирелә, Бөек Ватан сугышы ветераннары өчен бө­тен уңайлыклары булган йорт­лар төзелә. "Чиста су" программасы буенча өйләребезгә кергән су чәй­ләребезне тәмле итә. Авылларның социаль йө­зен тамырдан үзгәр­тү­че программаларга шатланып туя алмыйбыз. Без­нең буын кешеләре шундый матур көннәр өчен тырышып эшләде бит ин­де.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: