Хуҗа Хәсән авыл җирлегенең ветераннар советы рәисе Ольга Бояринаның тормыш юлы, хезмәт сөючәнлеге һәркемгә үрнәк

Авылдашым Ольга Боярина 1956 елның 10 июлендә Хуҗа Хәсән авылында гади колхозчылар гаиләсендә дөньяга килә. Ун балалы гаиләдә икенчесе була.

Балачактан ук хезмәткә өйрәнеп үсә: хуҗалык эшләрендә ярдәм итә, энеләре һәм сеңелләре турында кайгырта. Мәктәптә бары тик бишле билгеләренә генә укый, җәмәгать эшләрендә актив катнаша: отряд советы рәисе, мәктәп редколлегиясе әгъзасы була.

1971 елда Канаш финанс техникумына укырга керә. Аны уңышлы тәмамлап, финансист дипломы ала. Татарстан Республикасы Финанс министрлыгы юлламасы буенча хезмәт юлын Арча районының финанс бүлегендә башлап җибәрә. Анда әйдәп баручы икътисадчы булып эшли.
1978 елда Ольга авылдашы Ананий Боярин белән гаилә кора һәм туган авылына кайта. Тормыш иптәше машина йөртүче булып эшли, ә үзен Хуҗа Хәсән авыл

Советына баш бухгалтер итеп эшкә алалар. Колхоз җитәкчелеге белемле һәм тәҗрибәле белгечне тиз күреп ала, һәм, озак та үтми, Ольга Бояринаны Киров исемендәге колхозга баш экономист вазыйфасына күчерәләр.

Ирле-хатынлы Бояриннар, гомер буе авыл хуҗалыгы тармагында хезмәт итеп, туып-үскән районнары үсешенә зур өлеш кертте. Ольга Боярина тырышлыгы, җаваплылы булуы һәм үз эшен яратуы белән аерылып тора. Ул колхоз хезмәтчәннәре белән еш очраша, хезмәт нормаларын һәм түләүләрне исәпләү тәртибен аңлата, үзенең тәҗрибәсе һәм белемнәрен яшь белгечләр белән уртаклаша.

Лаеклы ялга чыккач, аңа Хуҗа Хәсән авыл җирлегенең ветераннар советын җитәкләргә тәкъдим итәләр. Ольга ханым бу тәкъдимне зур җаваплылык белән кабул итә, алда торган эшнең мөһимлеген яхшы аңлый. Туган авылын яратуы һәм өлкән буынга хөрмәте аның бу карарының төп сәбәбе була.

2016 елдан башлап, инде ун елга якын вакыт дәвамында, Ольга Боярина ветераннар советын җитәкли. Ул ветераннар белән даими очраша, ялгыз яшәүче авылдашларының хәлен белешә, аеруча ярдәмгә һәм игътибарга мохтаҗ кешеләргә терәк була. Аның башлангычы белән активистлар төркеме төзелә. Алар төрле чаралар үткәрә, махсус хәрби операциядә катнашучылар өчен гуманитар ярдәм туплый, туган як тарихын өйрәнә, авылдашларының гореф-гадәтләрен һәм мәдәни мирасын саклау белән шөгыльләнә. Мәдәният йорты һәм китапханә хезмәткәрләре белән берлектә, бу традицияләрне яшь буынга тапшыруга юнәлдерелгән чаралар оештырыла.

«Өченче буын университеты» проекты аерым урын алып тора. Анда Ольга Боярина атнага ике тапкыр дәресләр үткәрә. Аларга даими рәвештә 15 ветеран йөри.
Ул ветераннар советы әгъзалары белән бергә өлкәннәр арасында үткәрелә торган район спартакиадаларында катнаша, ярышларда җиңүләр яулый, «Балкыш» фестивалендә чыгыш ясый. Гаилә кыйммәтләрен үстерү үзәгенең көмеш волонтеры да әле ул. «Кызыл канәфер» Бөтенроссия проекты, «Әдәби марафон», «Татар сүзе», «Җәлил укулары» проектларында, нәфис сүз бәйгеләрендә һәм төрле әдәби чараларда актив катнаша.

2025 елда ул Казан шәһәренең мәдәни һәм социаль-икътисадый проектларга ярдәм итүче «Азамат» җәмәгать фонды үткәргән бәйгедә җиңүче булып танылды һәм диплом белән бүләкләнде.

Ольга Боярина «Кайбыч таңнары» газетасы редакциясе белән даими элемтәдә тора. Авыл җирлегендә яшәүчеләрнең тормышы һәм хезмәт уңышлары турында язмалар бастыра.

Җәмәгать эшләрендә актив булуына карамастан, ул һәрвакыт гаилә учагын саклаучы булып кала. Ире Ананий белән алар уллары Андрейны һәм кызлары Нина, Татьяна һәм Валентинаны тәрбияләп үстерде. Бүген балаларының үз гаиләләре бар, һөнәр үзләштереп, җаваплы вазыйфаларда хезмәт итәләр.

Ольга Боярина — кайгыртучан тормыш иптәше, сөекле әни һәм өч оныгы, биш оныкчыгы өчен бәхетле әби. Җәй җиткәч, аларның йорты балалар тавышыннан гөрләп тора. Зур бакча да, кош-кортлар да — барысы да тәрбия һәм игътибар сорый. Ул балаларында һәм оныкларында да хезмәткә мәхәббәт тәрбияли. Алар бергәләп кышка банкалар яба, район үзәгендәге музейларга бара, туган ягыбыз буйлап сәяхәт итәләр, ата-бабаларның гореф-гадәтләрен өйрәнәләр, шашка, шахмат һәм лото уйныйлар. Гаиләдә дини бәйрәмнәрне дә, гадәти булганнарын да бергәләп билгеләп үтәләр.

Көмеш волонтер шулай ук Турминскийдагы Изге Троицк чиркәвенә йөри. Аның настоятеле Николай Ермолаевка ярдәм итә.

Озак еллар дәвамындагы намуслы хезмәте һәм актив җәмәгать эшчәнлеге өчен авылдашым күпсанлы бүләкләргә лаек була. Алар арасында Россия Федерациясе Авыл хуҗалыгы министрлыгының Рәхмәт хаты, Татарстан Республикасы ветераннар (пенсионерлар) төбәк җәмәгать оешмасының Мактау кәгазе, «Молоды душой» республика Игелек үзәгенең Рәхмәт хаты һәм башка күп кенә бүләкләр бар.

Ольга Боярина кебекләр — авылыбызның зур байлыгы. Аларның тормыш юлы, хезмәт сөючәнлеге, киң күңеллелеге һәм туган җиргә тугрылыгы һәркем өчен үрнәк булып тора.

Ольга Шупшина, Хуҗа Хәсән авыл китапханәсе методисты