Кайбычта православие динен тотучылар Качману бәйрәмен билгеләп үтә
18, 19 гыйнвар көннәрендә район благочинные, протоиерей Николай атакай һәм гаилә кыйммәтләрен саклау үзәге җитәкчесе Надежда Ермолаева православие динен тотучы авылларда Качману унаеннан су коену өчен махсус билгеләнгән урыннарда сулыкларны изгеләштерделәр. Әлеге бәйрәм үзенең салкыннары белән дан тотса, быел һава торышы җылы булды.
Бүген Кече Мәмедәге Зур күлдә дә махсус бәке ачылган иде. Һәр бәйрәмне актив рәвештә билгеләп итүче авыл халкы Качману йоласын үтәүдә дә бердәмлек күрсәтте. Николай атакай суны изгеләштергәннән соң, гореф-гадәтләрне үтәп су коенучылар шактый булды. Шулай итеп, алар җаннарын да, тәннәрен дә сихәтләндерде. Күбесе бит-кулларын юып, бәкедәге суны савытларга тутырды. Чөнки мондый суның шифасы әйтеп бетергесез - күп авырулардан арындыра, савыктыра, диләр.
Бәйрәмгә килүчеләрне район башлыгы Альберт Рәхмәтуллин һәм шәхсән үз исеменнән башкарма комитет җитәкчесенең икътисад мәсьәләләре буенча урынбасары Эльвира Заһидуллина котлады, изге теләкләрен җиткерде.
Коенучыларны гына түгел, бу йоланы карарга килүчеләрнең барысын да кайнар чәй, тәмле ботка, коймак белән сыйладылар. Бәкедән ерак түгел чишенеп-киенү өчен җылы палатка урнаштырылган иде. Полиция, медиклар, гадәттән тыш хәлләрне кисәтү хезмәткәрләре кизү торды.
Следите за самым важным и интересным в Telegram-каналеТатмедиа
Нет комментариев