Кырымда узган онытылмаслык каникуллар

Юлламаны Зарина яшь армиячеләр хәрәкәте аша бушлай алды.

Лагерьга кадәрге юл күңелле һәм сизелмичә үтте. Поездда балалар бер-берсе белән танышты, өстәл уеннары уйнады, аралашты һәм вакытларын бик күңелле үткәрде. Сәфәр яхшы оештырылган иде: балаларны көненә өч тапкыр ашаттылар, ризыклар тәмле иде.

Лагерьга килеп җиткәч, ял итүчеләрне тугыз отрядка бүлделәр. Зарина 28 кешелек икенче отрядка эләкте. Балалар бик тиз уртак тел тапты, дус, аралашучан һәм тату булып чыктылар. Команда белән бердәм эшләү һәм барлык чараларда да актив катнашу нәтиҗәсендә аларның отряды икенче урынны яулады.

Лагерь программасы бик бай һәм кызыклы иде. Балалар өчен квестлар, бәйгеләр, спорт ярышлары, концертлар, милли бәйрәм Сабантуй һәм башка бик күп күңелле чаралар үткәрелде. Һәр көн истәлекле вакыйгаларга бай булды һәм бик тиз үтеп китте.

Иң истә калганы диңгез булгандыр, мөгаен. Лагерь аның ярында ук диярлек урнашканлыктан, балалар һәр көнне иртәнге аштан соң һәм кичке ашка кадәр диңгездә коенды. Ял итү белән беррәттән, алар өчен мавыктыргыч экскурсияләр дә оештырылды.

Беренче экскурсия «Эмине-Баир-Хосар» мәгарәсенә булды. Бу — Кырымның гүзәл табигатьле урыннарының берсе. Мәгарәгә төшкәч, балалар үзләрен гаҗәеп җир асты дөньясында кебек хис итте. Сталактитлар һәм сталагмитлар белән бизәлгән зур заллар, ялтырап торган күлләр, шулай ук борынгы хайваннарның — мәгарә аюы һәм мамонтның сакланып калган сөякләре һәркемдә онытылмаслык тәэсирләр калдырды.

Икенче экскурсия «Дримвуд» күңел ачу паркына булды. Балалар Америка тауларында шуды, төрле аттракционнарда уйнады һәм хәтта спорт автомобильләре белән дә идарә итеп карады.

Өченче экскурсия Алушта аквариумына оештырылды. Шәһәр үзәгендә урнашкан әлеге гаҗәеп су асты дөньясында диңгез һәм төче су хайваннарының, мәрҗәннәрнең һәм кабырчыкларның бай коллекциясе тупланган. Экскурсия балаларга күп кенә яңа тәэсирләр һәм уңай эмоцияләр бүләк итте.

Лагерь территориясендә кинотеатр һәм спорт мәйданчыклары да эшләде. Балалар кино карады, кичке дискотекаларда күңел ачты, футбол, волейбол, баскетбол, өстәл теннисы һәм бадминтон уйнады.

Смена дәвамында Зарина күп кенә яңа дуслар тапты. Алар, телефон номерларын алышып, алга таба да элемтәдә торырга сөйләште. Балалар янында һәрчак вожатыйлар Гүзәл белән Валерия булды. Алар дустанә атмосфера тудырды, коллективны берләштерде һәм балалар өчен чын остазларга әверелде.

Бу сәяхәт Зарина күңелендә иң җылы хатирәләр калдырды. Ул өенә ял итеп, кояшта каралып, якты тәэсирләр һәм уңай эмоцияләр белән кайтты.

Шуңа күрә, дуслар, яңалыклардан курыкмагыз, кызыклы проектларда актив катнашыгыз! Бәлки, нәкъ менә «Сатера» лагере сезгә онытылмаслык җәй, җылы диңгез, кояшлы көннәр һәм яңа дуслар бүләк итәр.

Надежда Фомина,
Кече Мәме мәктәбенең 
Владимир Козин исемендәге яшь армиячеләр отряды 
координаторы