Район ветеринария берләшмәсенең баш врачы Югары Осланда команда-штаб укуларында катнашты

Укулар терлекләрдә иң куркыныч авыруларның берсе булган Африка чумасы килеп чыккан очракта оператив чаралар күрүгә багышланган иде.
ТР Премьер-министры урынбасары – ТР авыл хуҗалыгы һәм азык-төлек министры Марат Җәббаров катнашында узган бу укулар ветеринария тармагында киң кулланылышта булган махсус техниканы караудан башланды.
– Бу күргәзмәгә без дә дүрт машина – УАЗ-буханка базасындагы мобиль ветеринария пункты, ветеринария тармагындагы махсус җайланмаларны үз эченә алган җиңел автомобиль, биологик калдыкларны ташучы махсус машина, дезинфекцияләүче техника алып бардык, – диде Илсур Зиядиев. – Республиканың барлык районнарыннан да килгән ветеринария врачлары терлекләрдә күзәтелүче аеруча куркыныч авыруларны кисәтү һәм бетерү юлларын практикада күрде. Мондый очраклар белән бары тик укулар вакытында гына очрашырга язсын.