Дөрес тәрбия – бәхет ачкычы

Республикадагы барлык комиссияләр әгъзалары өчен үткәрелгән әлеге утырыш Татарстан Республикасында бала хокукларын яклау буенча уполномоченный Гүзәл Удачина чыгышы белән башланып китте. Ул, балаларны социаль яктан тотрыклы булмаган гаиләдән алуның иң соңгы чик булуына басым ясады. Ул Югары Ослан районының Вахитов авылында авыру хатынның ике чирле баласын Кама Тамагы районындагы балалар йортына җибәрүләре, тормыш рәвешләре бө­тен Россия­гә телевидениенең "Пусть говорят" тапшыруы аша гыйбрәт итеп күрсәтелгән Тәтештәге тугыз балалы гаиләдәге балаларны шулай ук приютка урнаштыруларына, мо­ңа китергән сәбәпләргә тукталды. Аның чыгы­шын­да эчкечелек белән шө­гыльләнүче, очны очка ялгап яшәүче гаиләләрне сазлыкка кереп баткач кына түгел, ә бата башлаганчы, мөм­кин кадәр ир­тәрәк ачыкларга кирәклеге кызыл җеп булып ятты. Равил Фа­тыйхович әйтеп узганча, ярдәмгә мохтаҗлар үзләрен җәмгыятьтән ае­рылган дип хис итәргә ти­еш түгелләр. Бүгенге көн­дә бу юнәлештә барлык район һәм шәһәр­ләр­дә оештырылган балигъ бул­маган балалар белән эш­ләү һәм аларның хокукларын яклау комиссияләренә зур вазифа йөклә­нә.

Республика комиссиясе балаларның күзәтүчесез, кайгыртыр кешесез калуын кисәтү, хокук тәртибен бозуларны профилактикалау буенча аларның 2011 елдагы эшчәнлегенә анализ ясады.

Нә­тиҗәдә, район башкарма комитеты җитәкчесенең беренче урынбасары Рузалия Малова рәислегендәге Кайбычтагы комиссия беренче урынга лаек дип табылды. Икенче, өчен­че урыннарда - Теләче, Мөслим, Яңа Чишмә, Биектау, Әтнә, Әлки районнары.

Сүз дә юк, бөтен республика күләмендә уңай бәя алу балалар, яшүсмерләр, гаиләләр белән көндәлек, хәтта төнлә дә эшләүнең куанычлы нәтиҗәсе ул. Төнлә дим, чөнки комиссия тәкъдиме белән эчкече, авыр гаиләләргә кичке сәгатьләрдә дә алдан хәбәр итмичә генә рейдлар үт­кәрелә. Бу һич тә аларны кимсетү, яшәү рәвешләренә тыкшыну максатында түгел, ә исерек ата-ананың баласы салкыннарда туңып ятмыймы, тамаклары тукмы, ашарларына бармы, кич өйлә­рендә теләсә кем кәеф-сафа корып ятмыймы икәнлеген ачыклау өчен уздырыла. Рузалия Хәсәновна әйтеп узганча, ниндидер урыннар яулау үзмаксат түгел. Максат - бу якты дөньяга туган һәр балага бәхетле балачак бүләк итү. Моңа ирешү өчен балаларны яклау белән шөгыльләнүче төрле дәрәҗә­дәге оешмаларның кулга кул тотынып эшләве кирәк. Әмма монысы җитеп бетә алмый шул әлегә...