Эшмәкәрләргә ярдәм кимеми

Республикада кече һәм урта эшмәкәрлекне үсте­рү, ярдәм итү вакәләтләре бу агентлыктан алынды. Агымдагы елның 11 октябрендә ТР Президенты Рөстәм Миңнеханов кече һәм урта эшмәкәрлеккә ярдәм итү һәм үстерү өлкәләрен дәүләт тарафыннан җайга салу функ­цияләрен ТР Икътисад министрлыгына тапшыру турындагы Указга кул куй­ды. ТР Министрлар Кабинетында узган брифингта ТР икътисад министры Мид­хәт Шаһиәх­мә­тов белдергәнчә, бу адым республикада эш­мәкәр­ләргә ярдәм чараларының кимүенә ки­термәя­чәк. Быел бу мак­сатларга федераль һәм республика казналарыннан 1 миллиард сумнан артык яр­дәм каралган.

Район башкарма комитеты җитәкчесенең икътисад мәсьәләләре буенча урынбасары Илдус Гайнуллин әйтүенчә, соңгы елларда Инвестицион үсеш агентлыгы аша районыбыз эшмәкәр­ләре арасында да, "Лизинг-грант" программасы буенча акча алып, үз эшләрен башлап җибәрүчеләр шактый булды. Кошманнан Сәвия Садриева шу­шы программа аша сөтне пакетларга тутыру линиясе булдыру өчен матди ярдәм алган, Рәмис Хәй­ретдинов теплица төзе­гән. Федоровскоедан Фәр­гать Әхмәтшин инкубатор төзеп, үз бизнесын булдырган. Мәлки авыл кулланучылар җәм­гыяте дә саллы гына яр­дәм алуга ирешкән. Әлеге программаның икенче турында Кече Кайбычтан Гөл­шат Зәкиева да катнашкан, ул да эшмәкәрлекне үстерүгә ярдәм алачак. Алар балык үр­четү белән шөгыльләнергә җыена (рәсемдә). "Лизинг-грант"ның өченче туры 7 но­я­брь­гә кадәр дә­вам итә. Үз бәхетен сынап карарга теләүчеләр район башкарма комитетының икътисад бүлегенә мөрә­җә­гать итә ала.

Урта һәм кече эшмәкәрлек буенча сораулары булганнар өчен министрлыкта финанс-хокукый консультацияләр бүлеге дә эшли. Моның өчен биредә кайнар телефон линиясе дә булдырылган (524-90-90).