Иске Чәчкабта Җиңү бәйрәмендә ике ветеран катнашты

Укучыларның Җиңүгә, ватан солдатларына дан җырлаган шигырьләрен дә сугыш һәм тыл ветераннары күз яше аша тыңлады. Балачакларының, яшьлекләренең авыр, хәсрәтле мизгелләре күз алдына килеп, хатирәләре яңаргандыр... Шуңа да беравыздан теләк телиләр бит: "Балалар, оныкларыбызга сугыш ачысын күрергә язмасын берүк!.."
Авылдашлары, "Кайбыч" полиция бүлекчәсе начальнигы Рушан Хуҗин, 9 май бәйрәме белән котлап, изге теләкләрен юллады:
- Бу көн безгә, яшь буынга, үткәнебезне, ветераннарыбызны искә төшерү белән беррәттән, гыйбрәт бирү өчен дә кирәк. Аяз күк йөзенең, тыныч таңнарның, кояшлы иртәләрнең кадерен белергә кирәклеген онытмасак иде! Кадерле ветераннарыбыз алдында баш иябез, - диде ул.

Бәйрәм уңаеннан Олы Кайбыч авыл җирлеге башлыгы Рәмис Сафин, Иске Чәчкаб төп мәктәбе директоры Айдар Хәсәнов һәм авылның ветераннар Советын җитәкләүче Галимулла ага Хуҗин да чыгыш ясады. Бүген олыларның гына түгел, балаларның да күзләренә уйчанлык күренә. Һәркемнең гаиләсендә сугыш хатирәләре яши, Хәтер яши...

...Кем ничектер, ә мин Җиңү көнен мәрхүм Галимулла бабаемны уйлап үткәрәм. Үзен күреп белмим, мин дөньяга килергә бик күп еллар элгәре бакыйлыкка күчкән ул. Йөзен дә, иске фотолардан күреп, чама белән генә төсмерлим. Бөек Ватан сугышында алган яралары аның гомерен кыскарткан, күпсанлы оныкларын, оныкчыкларын күрүдән мәхрүм иткән. Югыйсә, минем бабам да бүген бәйрәм митингына барыр иде, мин, аның оныгы, ихлас рәхмәтемне әйтеп, чәчәк бирер идем...