Иске Тәрбиттә “Авыл клублары” программасы нигезендә күпфункцияле үзәк төзиләр

"Авыл клублары" республика программасы нигезендә авылларында күп­функцияле үзәк төзелә башлауга алардан да күб­рәк шатланучы булдымы икән!? Укытучылар тәкъ­диме белән утыз ел элек оешкан бу фольклор ансамбльнең даны еракларга таралган. Сабан туйлар алардан башка узмый, Мамадыштагы Питраудада да һәр елны гөрләтеп җырлап-биеп кайталар, авыл, районда гына түгел, Казан сәх­нә­ләрендә дә еш чыгыш ясыйлар.

- Безнең үз клубыбыз күп­­тән юк иде инде. Элеккеге иске мәктәп ашханәсе клуб ролен үтәде. Салкын, шартлары булмауга да карамастан, сылтау эзләмәдек, клубыбыз гөр­ләп торды. Бездә сәнгатьне яраталар, халык клубка күп йөри, әмма урын кечкенә булгач, барысы да сыеша алмаган чаклар да булды. Менә яңа бина төзелеп беткәч, рә­хәт­ләнеп иркендә чыгыш ясарбыз әле. Лаеклы ял­га чыккач та ике ел клуб мөдире булдым, былтыр эштән туктадым, әмма ансамбль белән җитәкчелек итәм әле. Яңа клуб төзелеше өчен район, Татарстан җитәкчелегенә авыл халкы исеменнән олы рәхмәтебезне җиткерәбез, - диде Михаил Герасимов.

- Хәзерге мәктәп янында элек ике катлы чиркәү бар иде. Совет чорында аны клуб итеп үзгәрт­те­ләр.

Почта бүлеге дә, колхоз бригадиры бүлмәсе дә, авыл китапханәсе дә шун­да булды, - дип сүзгә кушылды Иске Тәрбит ур­та гомумбелем бирү мәк­тәбе директоры Анатолий Васильев. - 1972 ел­да агачтан яңа клуб өл­герттеләр, әмма ул халыкка 31 ел хезмәт иткәннән соң, 2003 елның 9 гыйнвары төнендә янып китте. Бәхеткә, шул елның 1 сен­тябрендә бездә яңа мәктәп ачылды. Йөз елдан артык тарихы булган мәктәпкә яңа бина бик кирәк иде. Михаил Герасимов әйтеп узганча, элеккеге ашханәбез клубка әйләнде.

Күрше Мәлки авылындагы күпфункцияле үзәктә чыгыш ясаган саен андагы шартларга сокланып туймаган "Сәүдияр" ансамбле җырчылары гына түгел, бөтен авыл халкы көткән төзелеш бу. Авыл җирлеге җыелышларында, бездә кайчан клуб тө­зелә, дип район җитәкчеләренә мөрәҗә­гать итмичә калганнары юк иде. Ә бу юлы февральдә узган җые­лыш­та район баш­­­лыгы Альберт Рәх­мә­тул­лин өз­дереп әйтте: быел 1 сентябрьдә сездә яңа үзәк файдалануга тапшырылачак! Әйт­кән сүзе аткан уктай булды: февральнең соңгы кө­нендә төзелеш материаллары кайтара да башладылар. Ничә еллар буена "булыр", "булыр", дигән коры вәгъдәләрдән туйган Иске Тәрбит авылы халкы шул вакытта гына күңеленә тынычлык алгандыр, мө­га­ен. Мартта булачак мә­дәни үзәкнең беренче ни­гез ташлары салынды. Төзелеш бригадасы ике атна элек стеналарын өя башлады.

- Төзүчеләр эшне тиз то­та. Апрель-май айларында юл өзеклеге буласын исәпкә алып, җитәрлек күләмдә төзелеш материаллары ташып куйдылар. Хәзер төзелешне тоткарлыксыз алып барырга була, - диде Иске Тәрбит авыл җирлеге башлыгы Виталий Тимофеев.

- Яңа күпфункцияле үзәк ике йөз урынга исәплән­гән. Авыл җирлеге, авыл китапханәсе дә шунда булачак. Проект буенча клуб янында автомобиль­ләр кую урыны, Бөек Ватан сугышы ветераннарының якты истәлегенә куелган һәйкәл дә булачак. Үзәкне вакытында өлгертергә сүз бирәбез. Максатыбыз аны сыйфатлы итеп төзү, - ди төзүчеләр.

Россия күләмендә игълан ителгән Мәдәният елында төзелә башлаган бу үзәк иске клубтан ерак түгел.