Камилләшү өчен шартлар җитәрлек
Быел тәүге тапкыр мәктәп бусагасын атлап керүчеләр - XXI гасырда дөньяга килгән балалар. Алар - элеккедән килгән күркәм традицияләрне бүгенге заман таләпләренә яраклаштыручы буын.
Укучылар мәктәптә үз мөмкинлекләрен ачып, конкурентлыкка сәләтле шәхес булып формалашсын өчен федераль дәүләт мәгариф стандартларына нигезләнгән укыту программалары ярдәмгә килә. Мәгариф бүлеге начальнигы Илдар Шакиров әйтүенчә, әлеге стандартлар буенча эшләүгә, беренче чиратта, "Мәгариф" өстенлекле илкүләм проектында катнашучы мәктәпләр һәм педагоглар җәлеп ителде. Әлеге проект һәм 2010-2015 елларга республикада "Киләчәк" мәгарифне үстерү стратегиясе ярдәмендә районыбыздагы мәгариф учреждениеләренә заманча җиһазлар кайтартылды, укытучыларга грантлар алу мөмкинлеге ачылды, мәгариф хезмәткәрләренең эш сыйфатын бәяләүче яңа механизмнар эшли башлады, "Татарстан Республикасында электрон мәгариф" системасы уңышлы эшли, заман таләпләренә туры килгән шартларда белем алучы, спорт-сәламәтләндерү проектларында катнашучы укучыларның саны артты.
Гомуми мәгариф стандартларын гамәлгә ашыру белән беррәттән, сәләтле балаларны эзләп табу һәм аларга ярдәм итү системасы да эшләнде. Мәгариф бүлеге начальнигының август конференциясендә ясаган чыгышыннан күренгәнчә, иҗади мохит тудырылган гомумбелем бирү учреждениеләрендә шәхескә камилләшү өчен шартлар җитәрлек.
2011-2012 нче уку елында фән олимпиадаларының муниципаль этабында 8-11 сыйныфта укучы 553 бала катнашкан, аларның 17се җиңүгә ирешкән, 35е призлы урыннар яулаган. Олимпиадалар үткәрү нәтиҗәләре буенча җиңүчеләрнең күплеге белән Олы Кайбыч, Федоровское, Иске Тәрбит, Зур Подберезье мәктәпләре лаеклы рәвештә мактана ала. 31 укучы Бөтенроссия фән олимпиадаларының региональ этабында һәм Республика фән олимпиадаларында катнашу хокукы алды, әмма, ни кызганыч, соңгы 5 елда Бөтенроссия фән олимпиадаларында җиңү яулаган укучыларыбыз булмады. Илдар Шакиров муниципаль мәгариф системасының төп ресурсы кадрлар булуын да билгеләп узды. 2011 елда 34 педагог лидер-укытучыларның финанс хәлен яхшыртуга юнәлдерелгән "Безнең иң яхшы укытучы" конкурсында җиңүгә иреште. 2012 елда әлеге грантны алу өчен конкурста 60 укытучы катнашырга теләк белдерде. Мәктәп инфраструктурасы да үзгәреш кичерә. Зур Подберезье, Олы Кайбыч урта гомумбелем бирү мәктәпләрендә, Мәлки төп мәктәбендә, Кайбыч балалар сәнгать мәктәбендә, Олы Кайбычтагы "Миләшкәй" балалар бакчасында капиталь төзекләндерү алып барылды. Ул чыгымнар киләчәктә үзен аклаячак, билгеле. Ник дигәндә, укучыларга белем алу өчен уңайлы шартлар тудыру мәктәпләрне белеем һәм тәрбия учагы итеп кенә калмыйча, спорт-сәламәтләндерү, иҗат белән шөгыльләнү, үз мөмкинлекләрен тулысы белән эшкә җигү урыны да булачак.
Следите за самым важным и интересным в Telegram-каналеТатмедиа
Нет комментариев