Кайбыч яшь техниклар мәктәбе укучылары республика бәйгесенә судно һәм самолет модельләре алып барачак

- "Дәресләрдән соңгы мәк­­тәп" республика проекты кысаларында ачылган бу үзәк аша район мәк­тәп­ләрендә оештырылган түгәрәкләрдә 777 укучы шөгыльләнә. Ә үзәкнең үзенә 96 укучы йөри. Алар­ның техникага булган омтылышларын күр­сәгез иде сез! Араларыннан берничәсе генә булса да инженер, суднолар, са­молетлар, автомобиль­ләр төзүче һөнәрен сайласа, максатыбызга иреш­кән булачакбыз. Моны вакыт үзе күрсәтер. Ә эш­че һөнәрләре, техниканы яхшы белүчеләргә ихтыяҗ һәрвакыт булачак. Республикадагы шәһәр-районнарда мондый техник мәктәпләр Татарстан Президенты тәкъдиме бе­лән нәкъ шул максатта оештырылды да инде, - диде үзәк директоры Рифат Вәлиев, безне эш­чән­лек­­лә­ре белән таныштырып.

Үзәк ачылуның беренче көннәреннән үк биредә автомобильләр, самолетлар, суднолар мо­дель­­­ләрен ясау буенча түгә­рәкләр эшли башлаган. Булачак яшь кулибиннар үз куллары белән ясаган модельләрен конкурста күрсәтте. Олы Кайбыч урта гомумбелем бирү мәктәбе укытучылары Гөлинә Габдрахманова, Фәнил Зиннуров, Федоровское мәктә­беннән Николай Волков составындагы жю­ри укучылар хезмәтенә бәя бирде. Автомобиль модельләрен ясаучылар бәйгесендә Олы Кайбыч урта мәктәбе укучылары Ранил Мингалиев, Руслан Фәизов, Илназ Әбделхәеров, Илһам Гыйниятуллин катнашты.

Үзләре ясаган модель­ләр­­не төгәллеккә дә, тизлеккә дә сынадылар. Резина ярдәмендә хәрә­кәт итүче бу "автомобиль­ләр" яхшы гына җилдерә. Алар электр двигателе белән эшләүче автомобиль модельләрен дә күр­сәтте.

- Бу түгәрәккә без ул ачылган көннән үк йөри башладык. Җитәкчебез Рифат Вәлиев башта автомобиль модельлә­ренең төзелеше, аларны ясау схемалары бе­лән таныштырды. Дә­ресләрдән соң көн саен монда ашыгабыз. Түгәрәктә шөгыль­ләнү бик мавыктыргыч, безгә ошый. Физика, математика фәннәрен яхшы белү сорала. Чөнки һәр детальне билгеле үлчәм­дә ясарга, автомобиль хә­рәкәт­ләнсен өчен электр двигателен дөрес җыярга кирәк. Үз кулларың белән ясаган модельләрнең хә­рәкәт итүен карап тору горурлык хисләре уята, - ди егетләр.

Бәйгедә самолет модельләре ясау түгәрәгендә шө­­гыльләнүчеләр дә осталыкларын күрсәтте. Егетләр җитәкчеләре Мак­сим Смелов белән бергә самолет модельләрен очыртып та күр­сәтте. Судно модельләре дә шәп килеп чыккан. Араларында иң остасы Ранил Мингалиев булып чыкты. Илһам Гыйниятуллин белән Илназ Әбделхәеров - икенче-өченче урыннарда. Электр двигателе белән хәрәкәт­ләнүче автомодельләр бәйгесендә ике генә укучы катнашты. Чөнки мондый модельләр ясау һәр­кемгә дә бирелми. Аның өчен физика, математика белән дус булырга, төрле эш кораллары белән тө­г­әл эшли белергә кирәк. Руслан Фәизов ясаган модельне иң яхшысы дип таптылар. Икенче урынны Илһам Гыйниятуллин яулады.

Резина белән хәрәкәт­лә­нүче авиамодельләр ясаучылар бәйгесендә Олы Кайбыч урта мәктәбендә белем алучы егетләр генә катнашты. Жюри әгъзалары самолетларның төгәл, тиз очуына бәя бирде. Анда Ришат Низаметдиновка уңыш елмайды. Ислам Юнысов белән Илназ Абдуллин икенче-өченче урыннарны бү­леште.

Электр двигателе белән эшләүче суднолар модельләрен ясаучы егет­ләр эшенә бәя биргәндә, жюри җиңүне бертавыштан Кош­маннан Ил­нур Әхмәт­шинга бирде. Җитәкчеләре Айдар Насретдинов белән берлектә җилкәнле корабль моделен ясаган ул. Икенче урынга Колаңгы төп мәк­тәбеннән Ильмир Мостафин (җитәкчесе Юрий Дунаев) лаек булды. Зур Подберезье мәк­тәбеннән Виталий Феклин (җитәкчесе Галина Карлина) өченче урынга чыкты.

- Безнең Кошман мәк­тәбендә дә узган елның октябреннән судно модельләре түгәрәге эшли башлады. Җитәкчебез Ай­дар абый безне күп нәрсәгә өйрәтте инде. Түгәрәккә 5-9 классларда укучы 12 малай йөри. Пәнҗешәмбе, җомга көн­нәрендә үз мәктәбебездә шөгыльләнәбез, кайвакыт Олы Кайбычтагы "ЭКО" га да килә­без. Анда төрле деталь­ләр ясау, агач эш­кәртү өчен мөмкинлекләр күб­рәк, - диде Кошман мәктәбе укучысы Илнур Әхмәт­шин.

Модельләр ясау буенча республика бәйгесенең район этабы җиңүчеләре билгеле. Исәпләре - март-июнь айларында республика күләмендә үтәчәк бәйгедә дә сынатмау.