Кайбычта социаль яклау бүлеге хезмәткәрләре “Гаилә ярдәмгә мохтаҗ гаиләгә ярдәм итә” акциясе үткәрде
Яңа уку елы башланыр алдыннан базардагы җанлылыкны күрсәгез иде сез! Сатып алучылар арасында балаларын җитәкләгән ата-аналар күп булуы аңлашыла, чөнки яңа уку елы башланырга санаулы гына көннәр калып бара.
Баланы мәктәпкә җыясы бер дә җиңел түгел, кием-салымы да, уку-язу әсбаплары да күп кирәк. Хәзер элеккеге шикелле кирәкле әйбер өчен шәһәргә барасы түгел, үзебездә дә бөтен нәрсә бар. Барын бар, әмма бәяләре тешли. Күп балалы, аз керемле гаиләләргә, ятимнәргә кыенгарак туры килә. Әмма "акча юк" дигәнне бала аңламаячак, аңа да яшьтәшләренеке кебек яңа кием, матур сумка кирәк. Татарстан Президенты Рөстәм Миңнеханов теләктәшлеге белән тормышка ашырылучы "Мәктәпкә җыенырга ярдәм ит!" акциясе ярдәмгә мохтаҗ балаларга булышу йөзеннән оештырылды да инде. Бу акция Кайбычта да киң колач алды. Социаль яклау бүлеге хезмәткәрләре ике атна дәвамында базарда "Гаилә ярдәмгә мохтаҗ гаиләгә ярдәм итә" акциясе үткәрде. Үз балаларына мәктәп кирәк-яраклары алучылар чит балаларга да өлеш чыгарды. Байморзадан Валерий Чкаловны яхшы беләм. Ике ел элек яп-яшь хатыны вафат булгач, ике бала белән тол калды ул. Базарга быел беренче класска баручы улы Олег, бишенче класста укыячак Оксана белән килгән.
- Безнең гаиләгә ярдәм итәчәкләре турында хәбәр алгач, миннән бигрәк балаларым шатланды, - ди ул. Үзем шабашкада йөрим. Безне кайгыртулары өчен зур рәхмәт, - ди ул.
- Беренче укытучыңның кем икәнлеген беләсеңме соң? - дип сорыйм Олегтан.
- Беләм, Җәмилә апа Нестерова.
- Ә мин быел Мәлкигә барып укыйм, безнең мәктәптә дүрт ел гына укыйлар бит. Өйдә әтигә булышам: идән, газ өстен юам, өстәл җыештырам, -дип җавап бирде минем сорауларыма Оксана оялып кына.
Зур Подберезьедан Кадеровлар, Чекмаревлар да акцияне оештыручыларга рәхмәтләрен җиткерде.
Оешма-предприятиеләр эшләүчеләр дә шушы акция кысаларында үзләренең бер көнлек хезмәт хакларын "Шәфкатьлелек" фондына күчерде. Дүшәмбе көнне оешма-предприятиеләр җитәкчеләре, авыл җирлекләре башлыклары катнашында узган киңәшмәдә әйтелгәнчә, бүгенге көндә 289 мең сум акча җыелган инде.
- Хезмәт коллективларына тирән рәхмәтемне белдерәм, - диде район башлыгы Альберт Рәхмәтуллин. - Бу сумма максатчан файдаланырга тиеш. Укучыларның берсе дә үзен башкалардан ким хис итмәсен иде. Безгә һәр бала кадерле. Ярдәмгә мохтаҗ гаиләләрдәге балаларга бүләкләрне 23 августта район мәдәният йортында тапшырачаклар.
Следите за самым важным и интересным в Telegram-каналеТатмедиа
Нет комментариев