Кайбычта ясалма орлыкландыру технологлары беренче яртыеллыкка нәтиҗә ясады

- Һәр йөз баш сыердан уртача 62 бозау алынган, чагыштыру өчен - 2012 елның алты аенда бу күрсәткеч 61 иде. Аерма зур түгел, димәк, эшләргә дә эшләргә әле безгә. Ясалма орлыкландыру технологы һәр сыерга игътибарлы булырга ти­еш, сау-сәламәт бозаулар алыйк, дисәк, бу - беренче шарт. Терлекчелекнең кереме безнең тырышлыкка бәйле, - ди­де Нәгыйм Сибгатуллин чыгышында.

1 июльгә кадәр 3114 бозау алынган (былтыр шул вакыт эчендә - 3073). Мө­гезле эре терлекләр баш саны район буенча 15548не тәшкил итә. Гадәттәгечә, терлекчелектә алдынгылар сафында "Гө­­бенә", "Заволжье", "Алтын кырлар" атлый. Иң булдыклы технологлар да биредә эшли. Киңәш­мәдә аларны район башлыгының Рәхмәт хаты бе­лән бүләкләделәр. "Заволжье" җәмгыятенең Борындык филиалы технологы Мәдинә Мингалиева, мәсәлән, бу вазифада 2007 елдан бирле эшли, ә гомуми эш стажы 30 елдан артып киткән. "Чекмарев" крестьян-фермерлык хуҗалыгында эшләүче Оксана Емельянова исә терлекчелек фермасына ясалма орлыкландыру технологы булып нибары ике ел элек кил­гән. Башта ферманы җи­тәк­ләгән, хәзер ике эштә дә өлгерә җитез ханым. Агымдагы елның алты аенда аның фермасында 128 сыер каплатылган, 110 бозау алынган. Бү­ләк­ләнүчеләрнең тагын берсе - "Алтын кырлар" җәмгыятенең Багай филиалына караган Колабирде фермасы технологы Валентина Котомина. Ул 2004 елдан бирле ферма мөдире булып эшли. "Гөбенә" агрофирмасының Олы Тәрбит фи­лиалы технологы Светлана Кошкинаның тырышлыгы хезмәт нәтиҗәләреннән дә күренә - ул эш­кә килгәннән бирле үрчем алу 50 процентка арткан, алты айда 100 сыердан 82 бозау алуга иреш­кән. Светлананың хезмәттәше - Чүти филиалы технологы Рәшит Зөбәеровка күпъеллык нәтиҗәле хезмәте өчен Россия Федерациясе Авыл хуҗалыгы министрлыгының Рәх­мәт хаты тапшырылды.