Кошманнан Салих Мотыйгуллин ике килограммлы бәрәңге үстергән

Мотыйгуллиннар өе Кошмандагы иң матур өйләр­нең берседер, мөгаен. З­ә­вык белән җиткерелгән ике катлы бу өйдә Салих абый белән Сания апа, үзләре әйткәндәй, гади ге­нә гомер кичерәләр. Икесе дә инде лаеклы ялда, читтә яшәүче балалары кайтып йөри, оныклары күп вакытын биредә уздыра.

Аларның берничә сутыйлы яшелчә бакчасы тәҗ­ри­бә участогын хәтерләтә. Са­лих абый анда ни генә үстерми. Бәрәңгенең берничә төрле сортыннан ал­ып, карбыз-кавынга кадәр. Бәрәңгенең моңа кадәр күбрәк "Ада­ретто" сортын утыртканнар. Иң тәмлесе - шунсы, ди. Тик соңгы елларда начарайды, яңартырга иде, ди. Әле яңа гына үстерә башлаган "Ароза" сортлы бә­рәң­ге ике килограммнан 40 килограмм уңыш биргән. Икенче бер сортлысын ике чи­ләк утыртып, 36 чи­ләк алганнар.

- Ансын базарда Роза исе­м­ле хатыннан алган идем, сортын да шулай дип куштым, - ди Салих абый.

Бәрәңге уңышы белән мактанып булмаган елны шулкадәр җыеп уңыш алу кү­ңелле, әлбәттә. Күп көч сарыф итеп үстергәч, уңыш та аласы килә ич! Тик тәр­бияләгән белән генә түгел, быел бәрәңгегә әллә ни булды бит, күп бакчаларда сабагы бик иртә саргайды, кипте, ә Салих абыйның бәрәңгеләре без барганда ямь-яшел утыра иде әле.

Әллә инде җире шундый, әллә - кулы, Салих абыйның яшелчә уңышыннан зарланырлыгы юк. Унике чиләк сарымсак чыккан. Унар метрлы дүрт түтәлдә үскән кишер, үзләренә һәм балаларына гына җитү тү­гел, әле сатырга да кала. Зурларын биш капчык ара­лап алып, сораучыларга сатып та җибәргәннәр. Без инде, әлбәттә, аның сортын да сорадык.

- "Королева осени" дигәнне чәчәбез. Ә кишер ул, гомумән - иң югары уңыш бирә торган культураларның берсе. Гектарыннан 800-1000 центнерга кадәр уңыш алып була, - диде Салих абый.

Авырлыгы ике килограммга җиткән бәрәңгене, кишер­ләр­нең эрелеген кү­реп, исебез китте. Йодрык-йодрык суганнарга, зур-зур кабакларга, кавыннарга шаккаттык.

Тәҗрибәле бакчачы безгә аларны күрсәтеп кенә калмады, билгеле, ә үстерү серләре белән дә уртаклашты. Аларны без сезгә, һичшиксез, җиткерәчәкбез, тик хәзер үк түгел. Ә вакыты җиткәч. Шуңа күрә дә, хөрмәтле газета укучыларыбыз, газетабызга язылырга онытмагыз. Үзегез дә күреп торасыз, "Кайбыч таңнары" көннән-көн кызыклырак, эчтәлеклерәк булып чыга. Газетабызга яз­ыл­сагыз, райондагы бө­тен яңалыктан хәбәрдар булу белән бергә, бакчагызда мул уңыш үстерү серләрен дә, тормышта кирәкле баш­ка нәр­сәләр­не дә вакытында белеп торырсыз.

Инде яңадан бәрәңгегә әй­ләнеп кайтыйк. Иътибар ит­кән булсагыз, әле яңа гына фотобәйге игьлан иткән идек. Без аны бүген Салих абыйның гигант бәрәңгесе белән ачып җибәрергә булдык. Ә инде сездән, хөр­мәт­ле укучыларыбыз, фотолар көтеп калабыз.