Солдат сугышны сайлап алмый

Узган елларда мондый очрашу өч зонада уза иде, шуңа да бер районда яшәүче солдатлар бер-берсе белән сирәгрәк күрешә иде. Быел бергә җыелдылар, өстә­венә, Мәлки авылында ту­ып-үсеп, әфган сугышында чәчәктәй яшь гомере өзелгән батыр йө­рәкле егет Валерий Волков истәлегенә авыл җирлекләре командалары арасында милли көрәш буенча турнир да үткә­релде.

Россия Федерациясе, Татарстан Республикасы гимннары яңгыраганнан соң, район башлыгы Альберт Рәхмәтуллин әфганчыларга мөрәҗәгать итте:

- Хөрмәтле якташларым! Совет гаскәрләренең Әф­ганстан җиреннән чыгарылуына 24 ел вакыт узуга да карамастан, әлеге канкойгыч сугыш китергән кайгы онытылмый. Бу сугышта районыбыздан 72 егет катнашкан, шуларның 21е Хөкүмәтебез бү­ләкләренә лаек булган. Солдат сугышны сайлап алмый, ул Ватан алдындагы бурычын үти. Мәл­кидән Валерий Волков, Зур Тәрбиттән Владимир Драндров, Кошманнан Мансур Миңнуллин, Борындыктан Рамил Мөхәм­мәтҗановлар әнә шул бурычны үтәгәндә һәлак булган. Аларның исеме - мәңгелек.

Каһарман егетләрне бер минут тынлык белән искә алдылар. Аларның истәлеге итеп, әти-әниләре­нә, туганнарына бүләкләр тапшырдылар. Бу көнне туган көнен билгеләп узучы әфганчы, район үзәк сырхауханәсе хирургы Алексей Русовка да бүләк тапшырдылар.

Әле дә улы Валерийны са­гынып өзгәләнүче Анастасия Волкованың теләге барлык аналарның теләгенә аваздаш: сугыш уты бүтән беркайчан кабынмасын, аналарның күз яше таммасын. Ул ае­руча дулкынлана, чөнки бүген улының якты истәлегенә милли көрәш буенча турнир да үткәрелә­чәк бит.

Тантанага җыелучылар алдында Мәлки төп мәк­тәбе укучылары чыгыш ясаганнан соң, әфганчыларны Апас районы әф­ганчы-интернациона­лист­лар берлеге рәисе Фәнис Зәйнуллин бәйрәм белән котлап, иң изге теләкләрен җиткерде.

- Безгә, автобатта хезмәт итүче егетләргә, Әфганстан җирендә совет гаскәрләре карамагында булган барлык юлларны үтәргә туры килде. Тау араларындагы бормалы юлларда һәр борылышта диярлек безне үлем сагалый иде. Әле анда, әле монда дошманнар засада оештырды. Шундый засадаларның берсендә иң якын дустым, Төмән шәһәреннән Валерий Жиряковны югалттым, - дип искә ала ул елларны Олы Кайбычта яшәүче Фидаил Сибгатуллин.

Тантананың иганәчесе - "Гө­бенә" агрофирмасы әзер­ләгән чәй табыны артында алар сугышчан дусларын искә төшерде, хатирәләрен күңелләрендә яңартты.