Спорт җитезлекне ярата

Спорт киемнәрендәге яшь спортчылар өчен чын мәгъ­нәсендә бәйрәм булды бу көн. Төрле мәктәп­ләрдән булсалар да, бер-берсен танып беләләр, районда үткәрелгән ярышларда даими катнашып, дуслашып беткәннәр инде алар. Ә Иске Тәрбиткә район яшьләр сәясәте, физкультура һәм спорт бүлеге, мә­гариф бүлеге тара­фын­нан оештырылган 2012-2013 еллардагы спорт сезонын ачуга багышланган спартакиадага килделәр. Яшь бу­ын арасында сәламәт яшәү рә­ве­шен пропагандалау, укучыларны спортка тарту, иң көч­ле командаларны, спортчыларны ачыклау максатында үткәрел­гән спартакиадада 5-9 класс укучылары катнашты.

Мәктәп стадионында укучылар ярышларга әзер­ләнгән арада яшьләр сәясәте, физкультура һәм спорт бүлеге начальнигы Юрий Михайлов физкультура укытучылары белән әңгәмә үткәрде, бу уку елында район, республика күләмендә узачак ярышлар планы белән таныштырды.

Спартакиаданы ачу тантанасында район башкарма комитеты җитәкчесенең социаль мәсьәлә­ләр буенча урынбасары Фатыйма Бикбова, спортның ныклы ихтыяр көче тәрбияләвенә басым ясап, алга таба да спорт белән дус булып калуларын теләде. Юрий Валтерович укучыларны яңа спорт сезоны ачылу белән котлады һәм ярыш шартларын әйтеп узды. Узган елгы спартакиадада гаи­лә командалары арасында беренче урынны яулаган Федоровское авылыннан Григорьевларга кубок, диплом һәм истәлекле бүләк тапшырды. Ә ярыш флагын Татарстан Республикасы гимны яңгыравы астында былтыргы спартакиада җиңүчеләре - Федоровское урта гомумбелем би­рү мәктәбе командасы һәм, быелгы ярыш хуҗалары буларак, Иске Тәр­бит мәктәбе командасы укучылары күтәрде.

Ярыш 100 метр арага йө­герүдән башланып китте.

Кызлар арасында бу дистансияне үтәр өчен Ху­җа Хәсән мәктәбеннән Татьяна Макаровага нибары 13,74 секунд вакыт кирәк булды. Олы Кайбыч, Ульянково кызлары Адилә Гыйбадуллина, Светлана Суганова финиш сызыгын икенче-өченче булып үт­теләр.

Егетләрдән бу араны Фе­доровскоедан Илмас Гыйс­­мәтуллин 11,98 секунд эчендә узды. Мәл­кидән Антон Галкин, Борындыктан Рәзиф Хәй­руллин икенче-өченче урыннарда. Чаңгы, җи­ңел атлетика, туризм ярышларында да гел җи­ңү­ләр яулаучы Зур Урсак кызы Язилә Сираева 500 метрга йөгерүдә иң җитезе булды. Чүтидән Диана Смирнова, Олы Кайбычтан Ландыш Сибгатуллина аннан азга гына калышты.

Бер чакырым арага йө­гер­гән егетләр арасында Чүти мәктәбеннән Борис Федоровка тиңнәр табылмады. Ул бу араны 3 минут 11,47 секунд эчендә үтә алды. Икенче урынны Иске Тәрбиттән Евгений Кузнецов яуласа, өченче урында Федоровскоедан Вадим Моисеев.

Озынлыкка сикерүдә Мәл­кидән Алина Иванова җи­ңү яулады. Кошманнан Ләйсән Хәйретдинова, Хуҗа Хәсәннән Татьяна Макарова икенче-өченче урыннарда. Спортның бу төрендә Борындыктан Рә­зиф Хәйруллин, 4 метр 95 сантиметр арага сикереп, беренче урынны яу­лады. 4 метр 30 сантиметр күрсәткеч белән Мәлкидән Антон Галкин, Колаңгыдан Владислав Анисимов икенче-өченче урыннарны бүлеште.

Катнаш эстафета ярышларында һәр командадан ике егет, ике кыз чыгыш ясады. Шулай да составында Илмас Гыйсмәтуллин, Марсель Зарипов, Кристина Дунаева һәм Екатерина Улитина булган Федоровское командасы барыннан да җи­тез­рәк булып чыкты. Икенче урынны кайбычлылар ал­са, өченче урында - Чүти укучылары.

Гомуми нәтиҗәләр буенча беренче урынга чыккан Чүти мәктәбе күчмә кубокка ия булды. Федоровское, Мәлки командалары икенче-өченче урыннарда. Ярышларда призлы урыннарны яулаучы укучыларга, командаларга дипломнар, медальләр тапшырылды.

Район мәгариф бүлегенең баш белгече Рамил Зиннәтуллин һәр мәктәпкә алтышар баскетбол тубы, Юрий Михайлов бадминтоннар таратты. Спартакиада салют белән тәмамланды.