Улянковода яшәүче 90 яшьлек Татьяна Марфина: “Кияүгә ап-ак ефәк күлмәк киеп чыктым”

Ульянково авылында яшәү­че 90 яшьлек Татьяна Марфина да үзенә атап язылган тәбрикләү хатындагы җылы сүзләр­не шатлыклы күз яшьләре аша тыңлады. Үзе укый алмый инде хә­зер, күзләре начар күрә. Анда язылган "Бөек Ватан сугышы вакытында барлык авырлыкларны, батырлык һәм фидакарьлек үр­нәге күрсәтеп, намус бе­лән уздыгыз", дигән сүз­ләрне ишеткәч, бүлдереп, әйтеп куйды: "Сугыш башланганда миңа 19 яшь иде, әмма яшь дип тормадылар, бригадир итеп куйдылар. Тылда да фронт кебек иде бит, көнне-төнгә ялгап эшләдек тә эш­ләдек. Алабута ашап үскән буын без. Гомер буе физик хезмәт башкардым".

Тормышының кайбер хатирәләре хәтер сандыгында мәңгелеккә бикләнеп калган әбинең. Шулай да күп кенә сорауларыма төгәл итеп җавап бирә алды. Язмышы туган авылыннан аерылгысыз булган. Ульянковода туган, шунда гаилә корган, балалар үстергән, пенсиягә чыкканчы колхозда эшләгән. Алтынчы классны тәмамлаганнан соң ук тормыш арбасына җигелә башлаган. Илгә Җиңү алып кайткан фронтовик Алексей Марфин белән гаилә кора. "Туйлар ясап тормагансыздыр ин­де, заманасы авыр булган бит", - дим әбигә.

- Туебыз ике көн булды әле, кияү ягында да, кә­ләш ягында да. Ап-ак ефәк күлмәк киеп чыктым кияүгә.

Пар канатлар булып яшә­гән елларын гомеренең иң бәхетле чоры дип искә ала әби. Клуб мөдире булып эшләгән ире белән дүрт бала тәрбияләп үс­тергәннәр. Авылның үр­нәк гаиләсе булган алар. Булган дип үткән заманда сөйлим, чөнки Алексее 1976 елда ук вафат булган. Унбер ел элек тагын зур югалту кичерәләр: гаиләдә беренче булып туган кызлары Лидиянең гомере фаҗигале төстә өзелә. Белоруссиядә яшә­гән кызы белән киявен трамвайдан төшеп, юл аша чыкканда "КамАЗ" бәрдереп китә... Калган балаларына гомерләр сорап, Ходайга ялвармаган көне юк ананың. Улы Юрий гаиләсе белән Украинада, кызы Нина Казанда яши. Төп нигездә төпчек улы Владимир калган. Без Владимир Марфинны озак еллар буена җи­тәкче урыннарда эшләгән шәхес буларак беләбез. Соңгы елларда район мәшгульлек үзәге белән җитәкчелек итте. Аның кешелеклелеге, хез­мәт сөючәнлеге әти-әнисен­нән килә, диделәр. Улы белән килене Светлана әниләрен яратып карыйлар, урын-җире пөх­тә, өстәлләре тулы ризык.

Татьяна Марфинага Президент котлавын һәм район башлыгы бүләген тапшырырга килгән башкарма комитет җитәкчесенең социаль мәсьәләләр буенча урынбасары Фатыйма Бикбова белән Ульянково авыл җирлеге башлыгы Фәридә Сундурова бу гаиләгә бәхет теләде.