Яңа йорт авылга ямь бирә

Әлфия апаның шатлыгын уртаклашырга муниципаль район башлыгы, «Бердәм Россия» партиясенең Кайбычтагы сәяси Советы секретаре Аль­берт Рәхмәтуллин, район башкарма комитеты җи­тәк­чесенең социаль мә­сьәләләр буенча урынбасары Фатыйма Бикбова, йортны төзегән "Алтаир-1" төзелеш оешмасы җи­тәкчесе Ринат Миначев, төзелешне алып барган бригада прорабы Рәиф Гобәев, Кече Мәме авыл җирлеге башлыгы вазифаларын башкаручы Тамара Алексеева кил­гән иде.

- Авыр сугыш елларында илебез азатлыгы өчен кө­рәшкән, тылда җиңү якынайткан ветераннарга игътибар артуы шатлыклы күренеш. Аларның торак шартларын яхшырту буенча федераль программа нигезендә районда һәр авыл саен диярлек йортлар төзелде. Әле­ге йортны сез Сәмигулла бабайның зур бү­ләге итеп кабул итегез. Биредә һәрвакыт тынычлык, татулык хөкем сөр­сен. Шушы нигезнең рә­хә­тен күреп, балаларыгыз, оныкларыгыз кайгыртуын, хөр­мәтен тоеп озак еллар яшәргә язсын, - диде район башлыгы Әлфия апага бүләген тапшырып.

Ул шулай ук төзелешне алып барган "Алтаир-1" оешмасы җитәкчесе Ринат Миначевка, бригада прорабы Рәиф Гобәевкә Рәхмәт хатлары тапшырды. Төзүчеләр дә, авыл җирлеге башлыгы вазифаларын башкаручы да өй туена бүләкләр белән килгән иде. Алар да яңа йорт хуҗасына изге те­ләкләрен җиткерде.

- Мине шул кадәр зурлап, шатлыгымны уртаклашырга бүләкләр белән килгәнегез өчен чын кү­ңелдән рәх­мәтемне белдерәм. Шулай ук өлкән­нәргә карата кайгыртучанлык күр­сәтү­ләре өчен илебез җитәкчеләренә дә рәхмәтем зур. Ходай Тә­га­лә үзегезгә дә озын гомерләр, тыныч тормышлар бирсен, - диде Әл­фия апа.