Юллардагы чокырларны ямыйлар
Бүгеннән Кайбыч районы юлларында кышкы салкыннарда барлыкка килгән чокырлар кими башлар - "Татавтодор" ачык акционерлык җәмгыятенең Апас филиалындагы Кайбыч юл ремонт-төзелеш участогы юлларны төзекләндерү эшенә кереште.
Март бураннары ничек тырышып тирә-юньне карга күмсә, язгы кояш шулай җылытып, кар көртләрен эретә дә башлады. Юл төзекләндерүчеләрнең дә кызу эш чоры башланды. Участок начальнигы Айдар Әбүзәров әйтүенчә, чокырлы урыннарны тигезләү өчен салкын асфальт кулланыла, ул һава температурасы минус 10 градустан да түбән булмаганда эшләргә мөмкинлек бирә. Көннәр явым-төшемсез торганда, әлбәттә. Техник таләпләр буенча апрель урталарына кадәр салкын асфальтны юллар ямау өчен кулланырга мөмкин. Каратун станциясендәге асфальт заводы кайнар чимал белән төэмин итә башлагач, юлларның нык таушалган урыннарына яңа асфальт-бетон өслек салына башлый. Бу эш апрель ахырында башланыр дип көтелә.
17 чакрым 400 метр озынлыктагы Олы Кайбыч-Колаңгы трассасы районның иң мөһим юлларыннан санала, шуңа да төзекләндерүне нәкъ менә шул участоктан башладылар. Аннан соң Уланово-Каратун трассасының Югары Ослан районыннан Апас чигенә кадәрге өлеше ремонтланачак. Анысының озынлыгы 14 чакрым. Ә 38 чакрым озынлыктагы Олы Кайбыч-Камыллы юлын май урталарында ямый башларга уйлыйлар. Мөһим эштә бары бер генә бригада эшләгәнлектән, эш күләменең зур булуы аңлашыла. Чокырларны тигезләү беренче карашка гади тоелса да, техник яктан барлык таләпләрне дә төгәл үтәүне сорый. Асфальт кисүче махсус техника чокырлы урынны квадрат формасына китереп чистарта, аның өслеге битум белән эшкәртелә. Монысы иске асфальт белән яңасы тигез тоташсын өчен эшләнә.
Следите за самым важным и интересным в Telegram-каналеТатмедиа
Нет комментариев