Үз йортыңа җитми инде

Узган атнаның шимбәсендә Олы Кайбычта шун­дый ике йорт файдалануга тапшырылды. Тантанада район башлыгы Альберт Рәх­мәтуллин, башкарма комитет җитәкчесе Алексей Макаров, башка җитәкчеләр, төзү­челәр катнашты. Йортның берсен Фәнис Хәйруллин җитәкчелегендәге "Вика", икенчесен Равил Җәлә­лиев җитәкчелегендәге "Заман" җәмгыяте тө­зе­гән. Кошман авылында туып-үскән Бөек Ватан сугышы ветераны Ризатдин Әбрар улы Гыйматовның тормыш иптәше Мәфрүзә Камал кызына торакны "Вика" төзегән. Ризатдин ага Бөек Ватан сугышының башыннан азагына кадәр катнашып, хәрби хезмәттә барлыгы җиде ел вакытын үткәр­гән. Туган якларына әйлә­неп кайткач, гомере буе колхозда эретеп-ябыштыручы булып эшләп, лаеклы ялга чыккан. Озак еллар колхозда төрле эш­ләр башкарган Мәф­рүзә апа белән тату гаиләдә сигез бала тәрбия­ләп үстер­гән­нәр. Хәзерге вакытта алар­ның җи­десе исән. Ни кызганыч, яңа йортны Ризатдин ага да, Мәф­рүзә апа да күрә алмады. Ветеран былтыр бакыйлыкка күчсә, карчыгы әле сентябрьдә генә вафат булган. Шулай да, аларның зур истәлеге булып балаларына шушы йорт кала. Биредә бабайның кызы Гөлсинә Хисаметдинова гаиләсе яшиячәк. Район башлыгы аларны эшкә урнаштыру мәсьә­лә­сен дә хәл итәргә вәгъдә бирде.

Олы Кайбыч авылында яшәүче, Бөек Ватан сугышы ветераны Ярхәм Яма­лиевның тол хатыны Рабига апага йортны "Заман" җаваплылыгы чикле җәмгыять төзегән. Ярхәм ага да, карчыгы Ра­бига апа да Кошман авылыннан. Язмыш җилләре аларны Тадҗикстан якларына, Канибадам шәһә­ренә илткән. Ярхәм ага сугышка да шул шәһәр­дән алынган. Сугыш бет­кәч, Канибадам шәһәренә кайтып, озак еллар заводта эшләгән. Тормыш иптәше белән дүрт кыз тәрбия­ләп үс­тер­гәннәр. Ярхәм ага 1980 ел­да вафат булган. 1994 елда Рабига апа кы­зы Фле­ра, кияве Наил гаиләсе белән Олы Кайбыч авылына кайтып төп­ләнгән.

Район башлыгы ике йорт хуҗаларына да бу нигездә тату, сау-сәла­мәт тормыш, шатлык-куанычлар теләде. Йорт тө­зе­ле­шенә сәбәпче булган бабайлар рухына даими до­га кылып яшәргә кирәклеген әйтте.

Яңа йорт хуҗалары республика, район җитәкчелегенә, төзүчеләргә үзлә­ренең олы рәхмәтләрен җиткерде.