Бердәм дәүләт имтиханнары якынлаша

БДИ-2012 өчен Федоровское урта гомумбелем бирү мәктәбе базасында имтихан тапшыру пункты оештырылачак, аның эшендә 30 оештыручы катнашыр дип көтелә. Имтиханнар барышын Дәү­ләт имтихан комиссиясенең вәкаләтле вәкилләре контрольдә тотачак. Укучыларның нинди фән­нәрдән имтихан бирәчәкләре инде билгеле. Элеккегечә, рус теле һәм математикадан барлык 11 класс укучылары да имтихан тапшыра. 26 укучы физика, 16сы - химия, 48е - биология, 13е - тарих, 50се - җәмгыять белеме, 4се - информатика, 4се географиядән һәм берәр укучы рус әдәбияты белән татар теленнән имтихан бирү өчен гариза тапшырган. Гариза язу бе­лән бергә, аларның һәр­берсе имтихан тапшыру нормалары, кагыйдәләре һәм хокуклары белән таныш булулары турындагы документка кул куя.

Агымдагы уку елында мәктәпне тәмамлаучылар аттестат алу өчен ике фән­нән мәҗбүри имтихан тапшыра - рус теле һәм математикадан. Әгәр аларның берсенең нәтиҗәсе минималь баллдан азрак булса, шул ук елда, махсус билгеләнгән көн­нәрдә аны яңадан тапшырырга мөмкин. РФ Мәгариф һәм фән министрлыгының Мәгариф һәм фән өлкәсендә күзәтчелек итү буенча федераль хезмәте билгеләгәнчә, рус теленнән минималь чик - 36, математикадан - 24 балл. Әгәр нәтиҗә рус теленнән дә, математикадан да түбән булса, БДИны икенче уку елында гына тапшырырга рөхсәт ителә. Болай булганда, БДИ тапшыру турындагы таныклык бу уку елында бирелми, аттестат урынына мәктәптә белем алганлыкны раслаучы белеш­мә генә алачаклар. Һәр укучының имтихан нәтиҗәләре мәгълүматларның федераль базасында теркәлә.

БДИ нәтиҗәләре имтихан тапшыруның икенче елының 31 декабренә кадәр гамәлдә була. Нәтиҗәләр турында таныклык алган елда РФ Хәрби Көчләре сафларына хезмәткә ки­тү­челәр өчен таныклык хәрби хезмәттән азат ител­гәннән соң бер ел дәвамында үз көчендә кала.

Дәүләт аккредитациясенә ия булган югары һөнәри белем бирү мәгариф учреждениеләренә гражданнарны кабул итү тәр­тибе нигезендә, абитуриент гариза белән бергә БДИ нәтиҗәләре турындагы таныклыкның төп нөс­хәсен яки күчермәсен тапшырмыйча, гаризада җы­елган балларны гына да күрсәтергә мөмкин. Югары уку йортларының кабул итү комиссияләре мәгъ­лүматларның федераль базасыннан абитуриентлар тапшырган күр­сәтмәләрнең дөреслеген, шул исәптән БДИ нәтиҗә­ләрен дә тикшерергә бурычлы. Имтихан тапшыручы укучының башка укучылар белән чагыштырганда әзер­лек дәрәҗәсен тө­гәл бәяләү өчен махсус методика кулланыла. Аның ярдәмендә беренчел баллар тест нәтиҗәләренә күчерелә һәм 100 баллы система буенча имтихан нә­тиҗәсе исәпләнә.

Һәр фән буенча ел саен минималь чик билгеләнә, аны узган укучы төп гомумбелем бирү программасын үзләштергән, дип санала. Әгәр укучы БДИ нәтиҗәләре белән риза булмаса, рәсми нәтиҗә­ләрне игълан иткәннән соң ике эш көне дәвамында апелляциягә бирергә хокуклы.

БДИ-2012 тапшыру барышын контрольдә тоту системасы чыгарылыш класс укучыларына бердәй шарт­лар тудырачак. Контроль җәмәгать күзәтчеләре, прокуратура һәм Эчке эшләр министрлыгы хезмәткәрләре, видеокамералар ярдәмендә оештырыла.