Футбол мәйданын бөтен республика төзи

Узган атнаның җомгасында без Казанга юл тоттык, максатыбыз - төзелеш барышы, төзүчеләр бригадасы белән танышып кайту иде. Чистай урамы бе­лән Ямашев урамы кисешкән урында, Казанка елгасы буенда төзелүче әлеге стадион - илебездә­ге иң зур һәм тиңдәше булмаган спорт объектларының берсе. Җәйге уеннар башланырга санаулы гы­на айлар калып бара, шу­ңа да аны вакытында өл­гер­тү өчен төзү­че­ләргә яр­дәмгә Татарстанның барлык районнарын да җәлеп итәргә булдылар. ТР Президенты Рөстәм Миңнеханов та бу хактагы видеоконференцияләрнең берсендә стадион төзелешенең уртак эш бу­луы һәм анда бөтен республиканың өле­ше кер­ергә тиешлеген әйт­кән иде.

Футбол стадионы төзелеше мәйданы янында ми­не Кайбыч бригадасы җи­тәкчесе Рамил Нуруллин каршы алды.

- Без биредә узган ел­ның ноябрендә эш­ли башладык. Хә­зерге вакытта тө­зү­челәребез бетон эшләре, штукатурлау, кирпечтән стена өю кебек эшләрне башкара. Көннәр буена ачык һа­вада салкында эшлә­сәк тә, зарланмыйбыз, объектны вакытында өл­гертергә кирәк бит. Стадион дүрт өлешкә бүлен­гән, аның көнчыгыш, көн­батыш, төньяк, көньяк өлеш­ләре бар. Без, кай­быч­лылар, шуның төньяк өлешендә эшлибез. Биредә бассейн, кафе, спорт заллары һәм башкалар урнашачак. Район җитәкчелеге эшчәнлегебез бе­лән даими танышып тора, - диде ул.

Стадионда сәүдә һәм кү­ңел ачу үзәкләре, балалар шәһәрчеге, ресторан, төн­­ге клублар, спорт-бар, футбол атрибутикасы кибете, "Рубин" футбол клубы музее һәм башкалар булачак. Ә төзүче­ләр­гә куелган иң зур таләп - сыйфат. Киләчәктә футбол чемпионаты узачак бар шәһәр­ләрдә дә өстән караганда су лилиясен хәтерләтүче шундый зур стадион булдырырга җые­налар.