Сабыйлар дөньясында

Олы Кайбыч авылындагы "Миләшкәй" балалар бакчасына йөрүче сабыйлар чын мәгънәсендә бәхетле: рәхәтләнеп уйныйлар, хәрефләр танырга, язарга, рәсемнәр ясарга, җырларга-биергә өйрәнәләр, тәмле ашаталар, вакытында чиста урын-җирдә йоклаталар. Тәрбияче апа­лары да ярата үзлә­рен, кәефсезләнеп торсалар, шәфкать туташы сә­ламәтлекләрен тикшерә. Кыскасы, әти-әниләре көн озынына балалары өчен тыныч күңел белән йөри ала. Муниципалитет җи­тәк­челеге дә еш була балалар бакчаларында.

Әле шушы көннәрдә генә "Ми­ләшкәй"гә район башлыгы Җәүдәт Гаффаров мә­гариф бүлеге начальнигы Илдар Шакиров һәм башкарма комитет җитәкчесенең социаль мәсьәлә­ләр буенча урынбасары Рамилә Айзатуллова бе­лән берлектә килде. Буш кул бе­лән түгел - бала­лар­ның яшь үзенчәлегенә ка­рап, һәр группага бик күп уенчыклар бүләк итте район җитәкчесе. Үзләре зурлыгындагы кур­чакларга, машина, тупларга әй шатланды да соң сабыйлар.

Балалар бакчасының яңа җитәкчесе Венера Сафиуллина белән әңгәмә барышында бакчага җылылык җибәрүне тизләтү мә­сьәләсе кызыл җеп булып ятты. Балалар уйнаучы ком­лыкны яңарту, киләсе елда тәрәзәләрне пластикка алыштыру, бал­­кон ишекләрен яңарту хакында да сүз булды. Шушы көн­нәрдә урамга ике веранда ясый башларга җыеналар. Бу нә­ни­ләр прогулкага чыккач, аларны яңгырдан, үтә­ли җилдән саклау өчен ки­рәк. Район башлыгы кадр­лар белән тәэмин ителешнең торышы белән дә кызыксынды. Тәрбияче­ләр дә, башка персонал да җитәрлек.

- Сезгә зур миссия - шә­хес тәрбияләү бурычы йөкләнгән. Әлеге мактаулы һәм катлаулы хезмәтегездә сезгә уңышлар телим. Эшчәнлегегез турында ата-аналар белән дә җыелыш үткәреп, ике якның да теләк-фикерләрен исәпкә алып эшләсәгез, файдага гына булыр иде, - диде район башлыгы бакча коллективы белән саубуллашып.