Кайбыч таңнары
  • Рус Тат
  • Борындыкның иҗат коллективы район үзәгендә спектакль белән сәхнә тотты

    Рәхәт заманда яшибез бит, җәмәгать! Концерт-спектакльләр карарга башкалага барасы юк хәзер. Үзебездә атна саен тамаша, вакыт кына табылсын, берсен дә калдыр­маска тырышабыз. Чөнки артистлары да безнең җирлектә яшәүче, таныш кешеләр. Бәрлебашының "Мизгел" театр коллективы район мәдәният йортында спектакль куеп озак та үтмәде, узган атнада Борындыкның "Без кабызган утлар" иҗат төркеме...

    Шунысы игътибарны җәлеп итә, алда санап үткән коллективлар өчесе дә сәхнәләштерү өчен Данил Салихов әсәрләрен сайлаган.
    - Өч мәдәният йорты да бер авторның пьесасын сайлавы - очраклылык. Бу хакта белгәч, үзебез дә шаккаттык, - диде Борындык театр коллективы җитәкчесе Илсинә Хөснетдинова. - "Капчыктагы Мәгъфия" әсәре миңа бер укуда ук ошады. Ул алдау һәм урлау юлы белән мал җыю, байлык туплауның ахыры яхшы тәмамланмау турында. Гомумән, Данил Салиховның комедияләре хәзерге чор проблемаларын чагылдыра һәм бүгенге җәмгыятьтә күзәтелгән тискәре күренеш­ләрне фаш итә. Спектакльне Мөрәле һәм Шүширмә тамашачысына тәкъдим иткән идек инде, тагын берничә авылга барырга планлаштырабыз.
    Борындыкның эчәр сулары, сулар һавасы шундыймы икән әллә, биредә сәләтле халык яши. "Капчык­тагы Мәгъфия" спектаклен куеп, алар моны тагын бер кат раслады. Илсинә Хөснетдинова да кечкенә чагыннан ук сеңлесе белән сәхнәдән төшми. Җырлау сәләте аларга әниләре Ләлә Ярхәмовадан күчкән. Илсинә әнисен остазы дип саный. Ләлә ханым, сәламәтлеге какшау сәбәпле эштән киткәч, мәдәният йорты мөдире булып әле гыйнвар аеннан гына Илсинә үзе эшли башлаган. Ул спектакльдә төп рольне - сыер савучы кыз Мәгъфияне бик оста итеп уйнады. Аферист Сәлмән ролен башкаруны Федоровское мәктәбенең унынчы классында белем алучы Константин Шленкинга ышанып тапшырганнар һәм ялгышмаганнар, ул да бик матур уйнады. Рус исем һәм фамилияле егетнең татарча матур итеп сөйләвенә күпләр гаҗәпләнде бу көнне.
    - Тумышы белән Магнитогорск шәһәреннән ул. Яшь тә сигез айлык чагыннан бирле Борындыкта татар телендә сөйләшеп үсте, монда балалар бакчасына йөрде. Яшәргә дип шәһәргә киттеләр дә, яңадан безнең авылга кайттылар. Костя ул чагында да татарчаны онытып кайтмады. - Барлык мәдәни чараларда да актив катнаша, кемгә ярдәм кирәк булса, шуңа булыша, молодец егет ул, - диде Илсинә, Константин белән таныштырып.
    Закирә әби булып Рушания Нигьмәтҗанова уйнады. Ул Борындык авылындагы кибетләрнең берсендә сатучы булып эшли. Кира бандит кыз - 1 ролен "Кайбыч" спорт-техник клубы методисты Лилия Хәйретдинова башкарды. Кира бандит кыз - 2 булып китапханәче Алсинә Тимершина уйнады. Суфлер - укытучы Рафия Кәлимуллина, тавыш режиссеры - сигезенче класс укучысы Альмир Гарәфиев. Гармунда уйнап, сәхнә утларын көйләп, көч биреп торучы Гөлгенә Габдрахманова булды. Тамашачы спектакльнең башыннан ахырына хәтле гади авыл кызы Мәгъфия өчен ут йотып утыр­ды. Аферист Сәлмән аны төп башына утыр­тып, йортсыз да, акчасыз да калдыра язды. Өйләнеп, Казанга алып китәм дип алдап, кызны капчыкка салып, урамда ташлап калдырды. Ләкин Закирә әбинең зирәклеге аркасында Сәлмән үзе төп башына утыра. Үзешчәннәр шулкадәр ышандырырлык итеп уйнады ки, спектакль тәмамлангач, тамашачылар җиңел сулап куйды һәм озак итеп алкышлады.
    - Халыкта шундый әйтем бар: театр ул тормыштан алынган, ә тормыш - үзе театр. Әлеге спектакльне караган чагында мин аның сюжетын үзебезнең җирлектә булган вакыйгалар белән чагыштырып утырдым. Иске Чәчкаб авылында Сәет Батталов исемле легендар шәхес бар иде. Ул шулай ук кызларга хуш булып, тәрәзә төбеннән узган кешеләргә шигырь язып кала торган булган. Пьесадагы вакыйгалар бүгенге көндә күп булган аферистлардан сак булыр­га ишарә дә ул. Сез зур булмаган коллектив белән дә, матур гына репертуар туплап, мәдәни учакларны гөрләтеп, спектакль куярга мөмкин икәнлеген күрсәттегез, - диде район башлыгы урынбасары Рәмис Хәялиев, Борындык үзешчәннәренә рәхмәт сүзләрен ирештереп.
    "Сәхнә көзгесе" фестивалендә актив катнашканы өчен "Без кабызган утлар" театр коллективы район мәдәният бүлегенең Мактау кәгазе белән бүләкләнде.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: