Федоровское мәдәният йортына килен төште

Ветеран (пенсия яшендәге) үзешчән башкаручыларның "Балкыш" республика фестивале авыллардагы үзешчән фольклор ансамбльләргә яңа сулыш өрде булса кирәк. Авыл клублары коллективлары ветераннар Советлары белән берлектә тагын да рухланып иҗат итә хәзер. Федоровсое ветераннар Советы рәисе Нина Моисеева белән мәдәният йорты мөдире Татьяна Титова оештырган "Килен яучылау" тамашасында егетнең туган-тумачалары белән кыз йортына килүе, төрле сынаулар үтеп, үзенең кызга лаеклы булуын дәлилләве, булдыклылыгын раславы бәйнә-бәйнә тасвирлана. Борынгы җырларны да искә алдылар. Валентина Шебалова башкаруындагы яучы карчыкның үт­кенлеге, җи­тезлеге сокландыра - яучы нәкъ шундый булырга тиеш тә ин­де! Һәр йоланың килеп чыгышын да аңлаттылар. Ярәшү бүләге - балдак бирешү, мәсәлән, электән килә икән. Ул балдак буыннан-буынга күчкән, буыннар чылбырын өзми сакларга мөмкинлек бир­гән. Шуңа да гаиләләр нык, балалар әти-әниләренә рәхмәтле булган.

- Йолаларны барлаганда Владимир Дальның 1862 нче елгы тупланмасыннан яучылык турындагы рус халык мәкальлә­рен өйрәндек, "Церковно-народный месяцеслов на Руси" китапларына мө­рә­җәгать иттек. Борынгы йолаларның күпчелеге онытылса да, кайберләре, үзгәртелеп булса да, саклана әле. Оныгымның туенда кыз сатып алу йоласын үткәргәндә шул хакта уйландым, - ди спектакльдә кызның әнисе ролен баш­карган ветеран-укытучы Галина Романова.