Кайбыч таңнары
  • Рус Тат
  • Колаңгы икмәк кабул итү пунктында эшләүчеләр табыннарны икмәкле итүгә зур өлеш кертә

    Кырлардан ашлык кабул итү пунктына иген төяп килгән машиналар капка төбеннән эчкә тиз генә уза алмыйлар әле.

    Территориягә керер алдыннан лаборатория­дәге кызлар, арбаның өстенә менеп, игенне анализга ала, аннан соң машина үлчәүгә керә. Колаңгыдан "КамАЗ" шоферы Исфат Гәрәев бу рейста 21 тоннадан артык арпа төяп килгән булып чыкты. Үл­чәү­­дә эшләүче ханым бе­лән бер-берсенә күз сирпешеп алуларына игътибар итүемне күргәч, Исфат абый:

    - Минем хатыным Илсөяр бит ул. Монда 16 еллап эшли инде, - диде.

    Исфат абый Илсөяре бе­лән сөйләшеп тормады, кырга ашыга. Бер-берсен күз карашларыннан аң­ларга өйрәнгән инде алар. Исфат абыйдан урак барышы турында сораша башлагач: "Эшлибез ин­де", - дип кенә җавап бирде. Аз сөйләгәннәр га­дәт­тә күп эшләүчән була. 33 ел буена шофер булып эшләүче Исфат аганың шушы еллар эчендә күп­ме ашлык ташуын күз алдына китерүе авыр тү­гел.

    Аның машинасында ик­мәк­ анализга алынганнан соң, кызлар белән бергә лабораториягә уздым. Ниндидер фәнни лабораторияне хәтерләтте ул миңа. Әллә нинди приборлар бар анда. Ишек­тән килеп керүгә кара төстәге пластмасс банкалар тезелеп киткән. Андагы язуларга игътибар итәм: "Заволжье"ның Зур Урсак кырыннан китерелгән арпа, "Подберезье" хуҗалыгы, арпа...

    - Бу банкалардагы ашлык үрнәге ике тәүлек саклана. Без биредә бө­тен авыл хуҗалыгы культураларын да дымлылыкка, аксымга, җилемсәлеккә тикшерәбез. Әгәр дә хуҗалыкларда без ясаган анализ белән килеш­мә­сә­ләр, шушы ике көн эчен­дә килеп, кире тикшертә алалар. Әлегә андый очрак булганы юк. Элек анализ ясау берәр сәгатькә сузылса, хәзерге приборлар күрсәткечләрне бер минут эчендә билгели. Алар ашлыкта зарарлы корткычлар булу-булмавын да күрсәтә, - дип эшчәнлекләре белән таныштыра лабораториядәге әй­дәүче белгеч Татьяна Маннапова.

    - Бөҗәкләр очрыймы соң?

    - Юк. Ашлыкны турыдан-туры безгә ташыйлар бит. Хуҗалыклардагы ындыр табакларында сак­ланган иген булса гына очраулары ихтимал.

    Быелгы ашлыкның сыйфаты нинди соң?

    - Хуҗалык кырларыннан яхшы сыйфатлы ашлык килә. Бер генә машинаны да кире борып җибәргәнебез юк. Чүплелек дәрә­җә­се дә югары түгел. Уҗым культуралары ае­руча чис­та, чүпсез иде. Дөрес, яңгырларга кадәр игеннең дымлылыгы нормада булса, көчле явым-тө­шемнәрдән соң ул бераз артты. Иген киптерү агрегатлары тәүлек әйләнәсе эш­ли. Бездә ашлыкның кү­гә­реп ятуына һич кенә дә юл куелмый.

    Татьяна Маннапова хез­мәттәшләре Валерия Гусейникова, Наҗия Сибгатуллина белән Кайбыч кырларында үстерелгән игеннең ничәнче класслы булуын билгели. Сыйфатына карап, алга таба эшкәртү өчен ашлыкны төрле мәйданчыкларга бушаттыралар.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: