Максат – игеннәрне югалтуларсыз җыеп алу
Июльнең кыл уртасында Кайбыч игенчеләре дә җиң сызганып уракка төшкән иде. Әмма озак көттергән яңгырлар, нормасын үтәргә теләгәндәй, берничә көн буена чиләкләп койды гына.
Узган атнада ТР Президенты катнашында видеоконференция режимында узган республика киңәшмәсендә ТР Премьер-министры урынбасары - авыл хуҗалыгы һәм азык-төлек министры Марат Әхмәтов та яңгырларның урып-җыю эшләренә җитди үзгәрешләр кертүен әйтеп узды.
- Быел Татарстанда бөртекле культуралар уңышы эчке ихтыяҗларны гына канәгатьләндерергә җитәчәк. Кырларда үстерелгән ашлыкны түкми-чәчми җыеп алу мөһим, безгә игеннәрнең һәр килограммы кадерле. Бар көчне җитештерүчән, сыйфатлы хезмәткә юнәлдерергә кирәк, - дип мөрәҗәгать итте министр.
Узган ел биш миллион тоннадан артык ашлык үстергән республикада быел тулаем ашлык күләме өч миллион тонна булыр дип фаразлана. Быелгы урып-җыю кампаниясенең беренче көннәре шундый фаразга җирлек бирә. ТР Президенты Рөстәм Миңнеханов бу күрсәткечкә дә әле яхшы оештырылган хезмәт нәтиҗәсендә генә ирешергә мөмкинлеген әйтте.
Район авыл хуҗалыгы һәм азык-төлек идәрәсе начальнигы Рифкать Басыйров әйтеп узганча, район игенчеләре алдында 24 мең 423 гектар мәйданда бөртекле культуралар җыеп алу бурычы тора. Урып-җыюны тоткарлыксыз башкарып чыгарга мөмкинлекләр җитәрлек. Әле шушы көннәрдә генә "Заволжье" җәмгыятенә унбер, "Гөбенә"гә Чаллыдан ике "Нью-Холланд" комбайны кайтуы да җитештерүчәнлекне арттырырга нигез бирә. Ягулык-майлау материалларына да кытлык юк. Уракка килгәндә, "Гөбенә"дә борчак, сабан бодае, "Алтын кырлар"да арпа, арыш, "Заволжье"да борчак, арыш уңышын җыеп алуга керештеләр. Урак чорында Кайбыч игенчеләренә аяз көннәр генә юлдаш булсын иде.
Иң мөһим һәм кызыклы язмаларны Татмедиа Telegram-каналында укыгыз
