Кайбыч таңнары
  • Рус Тат
  • ШӘФКАТЬЛЕЛЕК БИЗИ КЕШЕНЕ

    Әгәр итсәң берәүгә син изге эш, үзеңә дә килер шундый ук өлеш. Утыз Имәнинең инде әллә кайчан язып калдырган бу сүзләре бүгенге көнгә дә аваздаш.

    Казанда Муса Җәлил исемендәге опера һәм балет театрында узган "Ел хәйриячесе-2013" республика бәйгесе җиңүчеләрен бүләкләү тантанасында да хәйриячелекнең тамыры еракларга барып тоташуы турындагы фикерләр еш яңгырады. "Яңарыш" фонды попечительлек Советы рәисе Минтимер Шәймиев, 2007 елның хакимият дәрәҗә­сендә Хәй­рияче­лек елы дип игълан ителү­ен тагын бер кат исебезгә төшереп, изге эшләребезнең алга таба да дәвамлы булачагына ышанычын белдерде. Әйе, күңел бай­лыгы кесә калынлыгы бе­лән бәяләнми. Кемгәдер яхшылык эшләсәң, ул си­ңа меңе бе­лән кире әйлә­неп кайта, шул исәптән тормыш тәҗ­рибәсе һәм акыл булып та. Татарстан Президенты Рөстәм Миңнеханов залда утыручы хәйриячеләргә рәхмәт бе­лән сугарылган мөрә­җә­гатендә шулай дип бел­дерде. Әлеге тантанада район башлыгы Альберт Рәх­мә­туллин, башкарма комитет җитәкчесенең социаль мә­сьәләләр буенча урынбасары Фатыйма Бикбова белән берлектә Кайбыч хәйриячеләре дә катнашты. Бәрлебашы авылында яшәүче Галия апа белән Мөнир Салаватовлар үз гаиләләренә чит балаларны сыендырган изге йө­рәкле кешеләр.

    - Бүгенге очрашуга безне дә чакырулары өчен зур рәхмәт. Үз балаларыбыз булмагач, әнә шулай ятимнәрне алып тәрбия­ләргә булдык. Инде оныкларыбыз да бар, өебездә бала тавышы тынып торганы юк, - ди Галия апа.

    Үзләре бу хакта сөйләргә яратмый, ятим­нәр үстерү - алар өчен гайре табигый хәл түгел, йөрәк кушуы буенча эшлиләр. Салаватовлар республика буенча ел хәй­рия­че­ләре булып танылды, Президент Рөс­тәм Миңнеханов кул куйган диплом белән дә бү­ләк­лән­де­ләр. Зур Урсак авыл җирлеге башлыгы Габбас Зиннатуллинның спонспорлык ярдәме турында без гел язып торабыз. Тантанада катнашкан Картлар һәм инвалидлар интернат-йорты ди­ректоры Альбина Абитова изге күңелле кеше­ләр белән һәрдаим очрашып торуларын әйт­те, чөн­ки хәй­рия­челәр - аларда еш кунак.

    Нравится
    Поделиться:
    Реклама
    Комментарии (0)
    Осталось символов: