Кайбыч таңнары
  • Рус Тат
  • Солдатка китә егетләр

    Россия Федерациясе Кораллы Көчләренең булачак солдатлары - көзге чакырылышта армиягә алыначак егетләр белән очрашу чын гаилә бәйрәменә әйләнде.

    Әлеге очрашу җылы шарт­ларда узды, анда бернинди дә рәсмилек юк иде. Чыгыш ясаучылар - муниципалитет җитәкчесе Альберт Рәхмәтуллин, Апас һәм Кайбыч районнарының хәрби комиссары Илшат Паймурзин, Бө­ек Ватан сугышы ветераны Гайнетдин Каюмов теләкләрен ачыктан-ачык җиткерде: армиядә хез­мәт итү җиңел түгел, авыр­лыклар булачак, әм­ма барысы да егетләрнең хезмәт итәргә нинди кәеф белән китүенә бәй­ле. Шуңа күрә дә очрашуның беренче мизгелләрендә үк алар белән эшлекле сөйләшү алып барылды, Ватанга хезмәт итүнең һәр егетнең изге бурычы икәнлеге әйтелде. Тиздән армиягә ки­тә­чәк Руслан Муллин, Наил Гайсин, Антон Калеев, Владимир Чекмарев, Илдар Әхмәтҗанов, Руслан Вәлиев һәм башкалар (көзге чакырылышта 29 егет солдатка китәргә тиеш) әлегә кайда һәм кайсы гаскәрләрдә хезмәт итәчәкләрен белми. Әмма аларның армиягә бару һәм туган якларына исән-сау әйләнеп кайту хисе көчле икәнлеге әллә каян сизелә.

    - Узган еллардагы традицияләрне дәвам итеп, без сезне бирегә ата-аналарыгыз белән бергә җыйдык, авыл җирлекләре башлыкларын да чакырдык. Нәкъ менә алар аша сезнең ничек хезмәт итүегез белән кызыксынып торачакбыз. Кайбыч егетләре армиядә сынатмады, алар турында гел яхшы фикерләр генә ишетеп тордык, командирларыннан ата-аналарына Рәхмәт хатлары еш килде. Сез дә шулай булырсыз дип ышанам, - диде район башлыгы. - Хезмәт итү вакыты бер генә ел, унике ай тиз узып китәр, шуңа да хәрби һәм физик әзерлегегезне ныгыту өчен аның һәр көнен нәтиҗәле файдаланып калырга тырышыгыз. Бу сезгә тыныч тормышта киләчәктә нык ярдәм итә­чәк. Туган якларга әйлә­неп кайтыгыз, безгә яшь­ләр бик кирәк.

    - Армия ирләрне кече Ватаннарын яратырга, ата-аналарын хөрмәт­ләр­гә өйрәтә, ныклыкта сыный, - диде үз чыгышында Гайнетдин Каюмов. - Без 6-7 ел хезмәт иттек, ә хәзер аны бер генә елга калдырдылар. Ата-аналар белән тыгыз элемтәдә торырга мөм­кинлекләр дә бар. Хезмәт итүчеләргә кәрәзле телефоннар да бирелә. Ә без­нең вакытта хатлар айлар буена йөри иде. Армия - тынгысыз хезмәт, тәртип, Уставка буйсыну ул. Сезне хәрби хезмәткә яраклы дип тапканнар икән, моңа шатланырга гына кирәк. Чөнки дөнья белән танышасыз, кешеләрне танырга, дуслык белән тугрылыкны бәя­ләргә өйрәнәсез. Барыгызга да уңышлар телим.

    Булачак солдатлар алдында Олы Кайбыч урта гомумбелем бирү мәктәбе укучылары һәм район мәдәният йортының сән­гать осталары концерт куй­ды. Армиягә китәчәк егетләр һәм аларның әти-әниләре өчен бәйрәм табыны да әзерләнгән иде.

    Нравится
    Поделиться:
    Реклама
    Комментарии (0)
    Осталось символов: