Марат Әхмәтов Кайбыч районында урак барышы белән танышты

Башка елларда районыбыз кырларын вертолетта күзәткәннән соң, берәр хуҗалыкта җитәкчеләр, авыл җирлекләре, крестьян-фермер хуҗалык­лары башлыклары белән очрашу үткәргән Марат Әхмәтов бу юлы безгә машинада килде. Иң беренче тукталыш – «Дубрава» җәмгыятенең Колаңгыдагы 320 гектар мәйдандагы шикәр чөгендере басуында булды. Район башлыгы министрны басулардагы эш барышы белән таныштырды, уракны кызу темплар белән үзвакытында төгәлләргә ышандырды. 
– Бүген безнең алда торган һәм игенчеләргә куелган төп бурыч  – җәйнең һәр аяз көненнән файдаланып, игеннәрне мөмкин кадәр тизрәк югалтуларсыз җыеп алу, – диде ул. – Моның өчен бөтен чараларны да эшкә җигәбез, эшне шул юнәлештә оештырабыз. 
Күренеп тора, чөгендернең уңышы мул булырга охшаган. Чөгендергә контроль үлчәү үткәргәннән соң, бу басуда уңдырышлылык һәр гектардан 300 центнердан артыграк булыр дигән нәтиҗәгә килделәр. Министр әйтүенчә, хәзер  вегетация чоры бара, димәк, уңдырышлылык тагын да артачак. Шикәр чөгендере үстерү технологиясенең  тиешенчә үтәлүе уңдырышлылыкка китерә. Кыр­ларда чүпнең әсәре дә юк. Яңгыр­лар вакытында тагын да күтәрелеп китәчәк әле алар. Министр чөгендер кырыннан канәгать калды. 
Алдагы тукталыш – Мөрәледә һәм  фермер хуҗалыгы җитәкчесе Марат Садриевның Кошманда үсүче көзге бодай басуында булды. Арысланда, Кыр Буасында да көзге бодайны карадылар. Икенче филиал агрономы Рәис Мингазиев әйтүенчә, комбайннар урган 107 гектарлы басуда һәр гектардан 32 шәр центнер уңыш алына. 
Кайсы гына хуҗалыкка барма, безне матур күренеш каршы алды. Кыр кораб­лары офыкларга кадәр сузылган басуларны иңли, башаклар тулышкан, игеннәргә карап, күңел сөенә. 
–Мин сезгә дә көзге культуралар мәйданнарын арттырырга тәкъдим итәм, – диде Марат Әхмәтов. –Татарстан чәчүлекләренең барлык мәйданы 3 миллион гектар тәшкил итә, шуның 450 мең гектарын гына көзге чәчүлекләр били. Бу бик аз. Көзге чәчү мәйданнарының һәркайсын җентекләп анализларга кирәк. Теләсә кайсы технологик алымны вакытында башкару мөһим. Көзге чәчү өчен туфрак бик яхшы әзерләнгән булырга тиеш. 
Безнең районда бу культура җиде меңлләп гектар мәйдан били һәм аны 10-11 гектарга җиткерергә уйлыйлар. 
Министр әйтеп узганча, көннәрнең кызу торуы уракны сыйфатлы итеп алып барырга мөмкинлек бирә һәм максатка ирешү өчен бөтен көчне куеп эшләргә кирәк. 
«Подберезье» да министр­га теземнәргә салынган борчак басуын күрсәттеләр. Монда арыш урагына да төшкәннәр, уңдырышлылыгы югары – гектарыннан 42 центнер уңыш чыга. Арпа кыры да мул уңыш вәгъдә итә. 
Министрлык сайты хәбәр иткәнчә, 6 августтан дәвамлы, көчле яңгырлар көтелә. Алар урып-җыюның барышына да, ашлык сыйфатына да тәэсир итми калмас. Шуңа бәйле рәвештә, Татарстан Республикасы Авыл хуҗалыгы һәм азык-төлек министрлыгы бу атнаны «удар урып-җыю атнасы» дип игълан итте. Бурыч – икенче атна башына кадәр көзге культураларны, өлгергән борчак һәм арпа культураларын җыеп бетерергә, моның өчен тәүлекләп эшләүне оештырырга кирәк.