Уйный-уйный остара
Кайбыч балалар сәнгать мәктәбенең баян классында укый башлавына әле беренче генә ел булуга да карамастан, Булат Сибгатов кулына гармунын алса, яшьтәшләре генә түгел, хәтта үз гомерендә оста гармунчылар белән күп очрашырга туры килгән өлкәннәр дә соклануын яшерми. «Бигрәк моңлы бала инде, өздереп уйный бит, килештерә», - диләр, аңа карап.
Моның сере гади - табигатьтән бирелгән сәләте көчле егетнең. Тумыштан күңелдә моң, дәрт утырса, бармаклар гармун телләрендә йөгереп кенә йөрсә, беркая китә алмыйсың - сәләт үзе өскә калкып чыга. Булат белән дә нәкъ шулай. Сәет бабасының оста гармунчы булуын авылдашлары гына түгел, бар Кайбыч халкы белә ләбаса. Булатның гармунда уйнарга атлыгып торуына шаккатасы түгел. Сәнгать мәктәбенә шуңа килде дә бит ул! Мәктәптә дә тырышып укый, менә рус теленнән тагын бераз тырышса, чиректәге дүртлесен төзәтә дә, апасы Лиананыкы кебек, аның да көндәлегендә гел бишлеләр генә тезелеп утырачак. Дүртенчене тәмамлап, зур классларга күчкәндә, бер дүртле белән сынатырга ярый ди мени?! Үзе укый торган Мөрәле мәктәбендә кочегар булып эшләүче әтисе Рөстәм белән хуҗалык эшләрен алып баручы әнисе Гөлинә тагын да горурланырлар әле уллары белән. Класс җитәкчесе Миләүшә апалары Хәсәнова тиктормас, үткен, җитез Булатны бары мактап кына телгә ала. Чөнки ул спортны да ярата, футбол уйнаганда тупны да шәп тибә, хоккей, волейбол ишеләрдә дә сынатмый, чаңгыда эх тә итмичә җитез элдерә, рәсемнәр ясарга да оста. Технология дәресләрендә дә кулы эшкә ята, фантазиясе бай булгач, нәрсә эшләсә дә, башына яңа фикерләр килеп кенә тора - ясап кына өлгер! Яңа ел бәйрәмендә гармунда татар җырларыннан тезмәләр уйнап, барысын да шаккаттырды, әле тагын да остарыр! Кем бу оста гармунчы дигәндә, Сәет бабай оныгы, диярләр. Менә күреп торыгыз, нәкъ шулай булыр!
Иң мөһим һәм кызыклы язмаларны Татмедиа Telegram-каналында укыгыз
