Күчмә кубок – Кече Мәме командасында

Районның Олы Кайбыч, Мәлки, Мөрәле, Кече Мә­ме, Кошман, Иске Тәрбит, Хуҗа Хәсән, Ябалак, Чүти авыл җирлекләре командалары катнашында үткән әлеге турнир ике келәмдә барса да, алты сәгатькә су­зылды. Көрәш башта укучылар, аннан соң, ир- егетләр арасында барды.

Беренче келәмдә кө­рәш­не Апас районыннан республика күләмендә татар- башкорт милли көрәше буенча хөкемдар, Татарстанда гына түгел, Россия күләмендә танылган көрәшче Ринат Гыйламов, икенчесендә Казан шәһә­рендә татар-башкорт мил­ли көрәше буенча тренер Наил Зиннәтов хө­кем ит­те. Ярышны 30 килограммга кадәр үлчәү авырлыгында чыгыш ясаучы яшь спортчылар башлады. Озак кына бил алышканнан соң, бу үлчәү категориясендә җиңүчеләр дә ачыкланды. Беренче- икенче урыннарны Кече Мәме авыл җирлеге командасыннан Иван Токсаров белән Владимир Козин бүлеште. Өченче урынны Мөрәледән Наил Тимергалиев яулады.

35 килограммга кадәр үлчәү авырлыгында да көрәш кискен барды. Бу үлчәү авырлыгында Кошманнан игезәкләр Шәф­кать һәм Нәфкать Фәй­зуллиннар, Иске Тәр­бит­тән игезәкләр Александр һәм Николай Демьяновлар чыгыш ясады. Бәйге барышында аларга бер- берсе белән дә бил алышырга туры килде. Шулай да бу үлчәүдә Шәфкать Фәйзуллин иң көчлесе булып чыкты. Олы Кайбыч командасыннан Рә­диф Зиннәтҗанов икенче урынга чыкты. Иске Тәр­­бит­тән игезәкләрнең берсе - Александр Демьянов өченче урынны алды.

40 килограммга кадәр үлчәү авырлыгында Ябалак авыл җирлеге командасыннан Кече Кайбыч егете Ранил Абдуллинга җиңү елмайды. Аның авылдашы Ранис Абдулхәеров өченче урынга чыкты. Икенче урынны Иске Тәрбиттән Станислав Кузнецов яулады.

45 килограммга кадәр үлчәү авырлыгында уңыш Кече Мәме егетләренә елмайды. Данил Токсаров һәм Николай Козин беренче-икенче урыннарны бүлеште. Кошманнан Айдар Камалиев - өченче урында.

50 килограммга кадәр үлчәү авырлыгында да Кече Мәме егетләре сынатмады. Дмитрий Майданов белән Игорь Федоров беренче-икенче урыннарны яулады. Олы Кайбычтан Азамат Михайлов өченче урынга чыкты.

Үлчәү авырлыгы арткан саен, көрәш кискенләшә барды. 55 килограммга кадәр үлчәү авырлыгында Мәлкидән Константин Луцев иң көчле кө­рәшче булуын кабат раслады. Авылдашы Дамир Хәбибуллин аңардан бераз гына калышты, ул- өченче урында. Икенче урынны Ябалак авыл җир­леге командасыннан Айдар Сибгатуллин яулады.

60 килограммга кадәр үлчәү авырлыгында Олы Кайбычтан Марсель Сәй­фуллин җиңүгә иреште. Ул көрәш барышында тех­ник алымнарны иң оста кулланучы буларак махсус призга лаек булды. Мәлкидән Антон Гал­кин, Мөрәледән Айрат Билалиев икенче-өченче урыннарда.

60 килограммнан югары үлчәү авырлыгында Кече Кайбыч авылы егете Ильмир Гашыйгуллин җиңүче булды. Укучылар арасында узган елгы Сабан туе батыры, Мәлки­дән Павел Горшков икен­че, Иске Тәрбиттән Артур Иванов өченче урынны алды.

Укучылар арасында кө­рәш тәмамлангач, келәмгә ир-егетләр чыкты. Элекке елларда Кайбыч Сабан туенда дан тоткан көрәш­че Җәүдәт Гайнуллин кабат көчен сынап карарга булды. Келәмдә ул Чүти авыл җирлеге командасыннан Зур Тәрбит егете Олег Корников белән бил алышты. Яшьлек үзенекен итә дигәндәй, Олег көчлерәк булып чыкты.

Ир-егетләр арасында 65 килограммга кадәр үл­чәү авырлыгында Кече Мәмедән Валерий Фомин иң көчлесе иде. Мәлкидән Сергей Бичарин икенче, Иске Тәрбиттән Владислав Васильев өченче урыннарны алды.

75 килограммга кадәр үлчәү авырлыгында Иске Тәрбит егетләре уңышлы чыгыш ясады. Артур Иванов беренче урынны яуласа, Дмитрий Петухов өченче урынга чыкты. Икенче урынны Кошманнан Динар Гатауллин алды.

75 килограммнан югары үлчәү авырлыгында узган елгы Сабан туеның абсолют батыры Николай Горшков җиңү яулады. Зур Тәрбит егете Олег Корников икенче урынга чыкты. Өченче урын Мәл­кидән Алексей Бичаринга бирелде.

Барлык призлы урыннарга чыгучы көрәшчеләргә истәлекле медальләр, Мак­тау кәгазьләре, акчалата бүләкләрне район башлыгы Альберт Рәхмә­туллин тапшырды. Кече Мәмедән яшь көрәшче Алексей Владимиров җи­ңүгә омтылышы, Мәлки­дән Руслан Митачкин тамашачылар күңелен яулаганы өчен Мактау кәгазе һәм махсус сын белән бүләкләнде.

Командалар арасында лаеклы рәвештә Кече Мәме авыл җирлеге командасы җиңү яулады. Аларга ТР Президентының документлар белән тәэмин итү һәм контроль идарәсе начальнигы, әф­ган сугышында һәлак бул­ган Валерий Волковның бертуган абыйсы Александр Иванович Вол­ков әлеге турнир өчен махсус эшләтеп кайткан күчмә кубок тапшырды һәм:

- Районда спортның милли көрәш төрен үстерүгә керткән тырышлыгы, энем Валерийның якты истәлегенә шундый турнир оештырулары өчен район җитәкчелегенә, биредә катнашкан барлык кө­рәшчеләргә олы рәхмә­темне белдерәм. Әлеге кубок күчмә, шуңа күрә бүген башланган турнир ел саен үткәрелеп, традициягә керер дип уйлыйм, - диде.

Икенче урынны мәлкилеләр яуласа, өченче урын Кошман авыл җирлеге командасына бирелде.