Кайбыч таңнары
  • Рус Тат
  • Менә алар – Татарстан чемпионнары

    Татарстан Республикасы яшьләренең II кышкы Спартакиадасы төгәлләнде. Һәм ул якташларыбызга уңыш алып килде.

    Әлеге спартакиада кысаларында 1995 елгы һәм аннан яшьрәк егетләрнең хоккей командалары арасында Олы Кайбыч урта гомумбелем бирү мәктә­бенең Илдус Вәлиуллин җитәкчелегендәге командасы Татарстан чемпионы исеменә лаек булды.

    Якташларыбыз әлеге җи­ңүгә катлаулы юллар аша килде. Финал ярышларында Идел аръягы зонасы районнарыннан Апас, Кайбыч, Тәтеш, Чүпрәле командалары үзара көч сынаша. Финалда кайбычлыларга Тәтеш командасы белән кискен көрәш алып барырга туры килә. Төп вакыт 5:5 исә­бенә төгәлләнә. Өстәмә вакытта якташларыбыз көн­дәш­ләре капкасына тагын бер алка кертеп, җиңүне тартып алалар. Ләкин тәтешлеләрнең болай гына бирешәселәре килми, алар ТР Яшьләр эшләре, спорт һәм туризм министрлыгына, кайбычлылар командасында чит­тән куелган уенчылар бар дип, шикаять язалар. Шуннан соң, ТР хоккей федерациясе әлеге көн­дәшләргә яңадан уйнау шарты куя. Бу уенда кайбычлылар тә­тешлеләрне 6:1 исәбе белән тар-мар итәләр. Шулай итеп, гаделлек өстенлек ала.

    Беренче-икенче урыннар өчен якташларыбызга Апас районы командасы белән көрәшергә туры килә. Әлеге очрашу кайбычлылар файдасына 7:0 исә­бенә төгәлләнә.

    Спартакиада кысаларында үткән бу ярышларда Олы Кайбыч урта гомумбелем бирү мәктәбе командасы составында уналты егет чыгыш ясый. Ләкин, мәктәптә укулар ике сменада алып ба­рылу сәбәп­ле, без аларның җи­десен генә фотога төше­рә алдык.

    Күптән түгел район яшь­ләре форумында команданы зур җиңүе бе­лән кот­лап район башлыгы Җәүдәт Гаффаров та алар­га истәлекле бүләкләр тапшырды. Казан шәһә­реннән егетләр Мактау кәгазе, беренче дәрәҗә­дәге медальләр һәм кубок белән кайтты.

    Бераз тарихка да күз салып китик. Олы Кайбыч мәктәбенең хоккей командасы үзен республика ярышларында 2008 елдан бирле танытып килә. Бу елда алар "Алтын ал­ка" призына Түбән Ка­ма шәһәрендә үткә­релгән ярышта III призлы урынны яуладылар. 2009 елда Саба районында узган ТР укучыларының IV Спартакиадасы кысаларындагы финал ярышында III, 2011 елда шул ук Саба районында булган ТР укучыларының V Спар­такиадасында III урын­ны алганнар иде. Алдагы елларда да егетләребезгә бары уңышлар юлдаш булсын дигән те­ләктә калабыз.

    Нравится
    Поделиться:
    Реклама
    Комментарии (0)
    Осталось символов: