Кайбыч таңнары
  • Рус Тат
  • Олы Урсак авылында Габделхәй Зиннәтуллин истәлегенә чаңгы буенча эстафета ярышы узды

    Олы Урсак авылында озак еллар колхоз рәисе булып эшләгән Габделхәй Зиннәтуллинның якты истәлегенә чаңгы буенча эстафета ярышы үткәрү бу авылда матур традициягә әйләнде. 7 мартта кабат узды ул, монысы - алтынчысы. Бәйгенең спонсорлары: Габделхәй аганың улы, Зур Урсак авыл җирлеге башлыгы Габбас һәм оныгы Марат Зиннәтуллиннар.

    Ярышта район мәктәп­лә­ренең 2001 елгы һәм аннан яшьрәк укучылары катнашындагы тугыз команда: Зур Урсак, Олы Кайбыч, Мәлки, Чүти, Олы Подберезье, Хуҗа Хәсән, Ульянково, Федоровское, Колаңгы мәктәпләре командалары катнашты. Һәр команда составында өч кыз һәм өч малай чыгыш ясады. Малайлар- өч, кызлар ике чакрымда ярышты.

    Көндәшләрен шактый артта калдырып, Зур Урсак урта мәктәбе командасы беренче булып финиш сызыгын үтте. Хуҗа Хәсән мәктәбе командасы икенче, мәлкилеләр өченче урынга чыкты. Чаңгычыларны кайнар чәй, тәмле коймак белән дә сыйладылар. Бәйгенең төп хө­кемдары - район яшь­ләр эшләре, физкультура һәм спорт бүлеге начальнигы Юрий Михайлов нәтиҗә­ләрне игълан итте.

    - Озак еллар дәвамында туган авылында колхоз рәисе булып эшләгән Габделхәй ага Зиннәтуллинны шулай олылап искә алуыгыз, аның истәлегенә чаңгы ярышы үткә­рүегез - игелекле гамәл. Авылның киләчәге өчен зур көч куйган кеше ул. Бу ярыш елдан-ел киңрәк колач алсын. Әтиләрен онытмыйча, әнә шундый чара үткәргән өчен улына зур рәхмәт. Яшьләрне спортка тартуда, аларда сәламәт яшәү рәвеше тәрбияләүдә зур өлеш кертәсез , - диде район башлыгы Альберт Рәх­мәтуллин.

    Ярышның төп спонсоры Габбас Зиннәтуллин җи­ңүче командага күчмә кубок, диплом, бүләкләр һәм истәлекле медальләр тапшырды. Зур Урсак командасы, өч ел рәттән җи­ңү яулап, күчмә кубокны үзләрендә бөтенләйгә калдырды. Икенче, өченче дәрҗәдәге дипломнарга, бүләкләргә һәм истәлекле медальләргә Ху­җа Хәсән һәм Мәлки командалары лаек булды. Шәп командалар әзер­ләгән тренерларга да медальләр, бүләкләр бирелде. Бәйгедә катнашучыларның берсе дә бүләк­сез китмәде.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: