«Президент ярышлары» дәвам итә
25 гыйнварда Иске Чәчкаб авылы төп мәктәбе спорт залында район мәктәпләренең 5-9 класс укучылары арасында "Президент ярышлары"ның район этабы үтте.
Ярышларда районның 16 мәктәбеннән командалар катнашты. Укучылар турникта тартылу, идәннән этелү, идәнгә яткан килеш гәүдәне күтәрү, кыска арага йөгерү, алга авышу, урыннан озынлыкка сикерү буенча көч сынашты. Турникта тартылу буенча ярышта Олы Кайбыч урта гомумбелем бирү мәктәбе укучысы Айдар Билаловка тиңнәр булмады. Икенче-өченче урыннарны Федоровское мәктәбеннән Вадим Моисеев һәм Олы Кайбыч мәктәбеннән Ирек Зыядиев бүлеште. Кызлар арасында идәннән этелү ярышында Хуҗа Хәсән мәктәбеннән Снежана Быкова җиңүгә иреште. Икенче урынны Федоровское мәктәбеннән Екатерина Улитина яулады. Өченче урынга Борындыктан Диана Гобәйдуллина чыкты.
Идәнгә яткан килеш гәүдәне күтәрүдә егетләрдән Алмаз Тимергалиев (Мөрәле), Александр Писарев (Зур Подберезье), Ильмир Шәмсетдинов (Борындык) призлы урыннарны бүлеште. Мәлкидән Анна Бичарина, Яна Митачкина беренче-өченче урыннарны яуласа, Кошманнан Ләйсән Хәйретдинова икенче урынны алды. Кыска арага йөгерүдә Федоровское мәктәбеннән Вадим Моисеев, Марсель Зарипов беренче-икенче урынга чыкты, Иске Чәчкаб мәктәбеннән Ранис Сөләйманов өченче күрсәткечкә иреште. Бу ярышта Чүти кызы Динара Әхмәтшинага тиңнәр булмады. Ульянководан Светлана Суганова икенче, Екатерина Улитина өченче урынны алды. Алга иелүдә Мәлкидән Николай Гаврилов беренче, Дамир Хәбибуллин икенче, Чүтидән Илназ Биктимеров өченче булды. Ярышның бу төрендә Гөлинә Зиннурова, Ландыш Сибгатуллина (Олы Кайбыч), Фирүзә Хуҗина (Борындык) призлы урыннарга чыкты. Урыннан озынлыкка сикерүдә егетләр арасында Федоровскоедан Илмас Гыйсмәтуллин, Марсель Зарипов беренче-икенче урыннарны бүлешсә, Колангыдан Владислав Анисимов өченче урынны алды. Ләйсән Хәйретдинова - беренче, Зур Подберезьедан Ксения Новикова икенче, Кече Мәмедән Татьяна Дворянская өченче урында.
Командалар арасында гомуми нәтиҗәләр буенча Мәлки мәктәбе командасы (тренерлары Александр Галкин) беренче урынны яулады. Икенче-өченче урыннарны Федоровское (Юрий Григорьев), Борындык (Хәмзә Юнысов) командалары бүлеште.
Шәхси беренчелектә призлы урыннарга чыккан укучыларга Мактау кәгазьләре, медальләр, истәлекле бүләкләр тапшырылды. Мәлки командасына күчмә кубок, призлы урыннарга чыккан калган командаларга дипломнар тапшырылды.
Иң мөһим һәм кызыклы язмаларны Татмедиа Telegram-каналында укыгыз
