Валерий Волков истәлегенә үткәрелгән милли көрәш турнирында кубокны Кече Мәме көрәшчеләре алды

Әлеге турнирда җиде мәк­тәп һәм сигез авыл җирлеге командасы катнашты. Турнирны ачу тантанасында район башлыгы Альберт Рәх­мәтуллин, Валерий Волковның әни­се Анастасия Алексеевна, авыл җирлекләре башлыклары, хуҗалык җи­тәкчеләре, әфганчылар, Валерий Волковның классташлары һәм авыл халкы катнашты.

Анастасия Волкова үз чыгышында интернациональ бурычын үтәгәндә һәлак булган улын онытмаулары өчен район җи­тәкчелегенә рәхмәтен белдерде һәм бәйгедә катнашучы яшь спортчыларга Ватанны сакларга яраклы, нык, сәламәт булып үсүләрен теләде. Район башлыгы Альберт Рәхмәтуллин үз чиратында бу турнирның ел саен үткәреләчәген ышандырды. Турнирны ачу тантанасыннан соң, ике келәм­дә кызу көрәш башланды. Ул укучылар арасында сигез, ир-егетләр арасында ике үлчәү авырлыгында барды. Узган елдагыча, Кече Мәме авыл җирлеге көрәшчеләре зур әзерлек белән килүләрен күрсәтте. Алар турнир нә­тиҗәләре буенча икенче ел рәттән күчмә кубокка лаек булды. Келәм хуҗалары - Мәлки авыл җирлеге көрәшчеләре икенче ел рәттән икенче урынны яулады. Иске Тәрбит авыл җирлеге командасы өченче урында. Кече Мәме көрәшчеләре мәктәпләр командалары арасында да җиңүгә иреште. Иске Тәрбит һәм Мәлки командалары - икенче-өченче урыннарда.

Шәхси беренчелектә үз үлчәү авырлыкларында Кече Мәмедән Владимир Козин, Кирилл Козин, Даниил Токсаров, Игорь Федотов, Валерий Фомин, Шәфкать Фәйзуллин (Кош­ман), Константин Луцев (Иске Тәрбит), Николай Горшков (Мәлки), Ранил Абдуллин, Ильмир Гашыйгуллин (Кече Кайбыч) беренчелекне яулады. Мәлкидән Данил Губеев, Антон Галкин, Алексей Горшков, Кече Мә­медән Алексей Владимиров, Дмитрий Майданов, Владимир Ворожейкин, Кошманнан Нәфкать Фәй­зуллин, Иске Тәрбиттән Александр Демьянов, Артур Иванов икенче урынга чыкты. Мәлкидән Никита Маланьев, Сергей Блинов, Василий Воробьев, Павел Горшков, Иске Тәрбиттән Руслан Иванов, Николай Демьянов, Андрей Михайлов, Алексей Иванов, Кече Кайбычтан Данис Әбделхәеров, Бәлидән Газиз Шәй­хетдиновка өченче урын бирелде. Барлык җиңүче­ләргә һәм призлы урыннарга чыгучыларга район башлыгы Альберт Рәхмә­туллин дипломнар, тиешле дәрәҗәдәге истәлекле медальләр, шулай ук, акчалата бүләк тапшырды.

Бу турнир нәтиҗәләре буенча апрельдә спортның милли көрәш төре буенча үткәреләчәк республика ярышларына районның җыелма командасы сайлап алынды.