Челтерәп ага чишмә

Суының челтерәп агулары колагына ишетелә баш­лагандыр инде, күрә­сең, югыйсә, шундый зур эшкә бербашы тотынмас иде. Дөрес, соңрак башлангычны авылдашлары күтәреп алды, булыштылар, әмма көймә комга терәлә дигәндә беренче ярдәмне күрсәтүче хәзерге район башлыгы Альберт Илгизәр улы Рәхмә­туллин булды. Ул чакта ул гади агрофирма җитәкчесе иде әле. Берсүзсез изге эшкә теләктәшлек белдерәсен әйтте һәм матди ярдәм күрсәт­те. Чүти халкы гомер-гомер­гә Тутый кош елгасы янәшәсендәге су чыганагыннан файдаланган, ни сә­бәптер, соңгы елларда кизләүгә юл онытылды, ул ташландык хәлгә килде. Җаны әрнеми ничек түзсен Мансур ага? Үзе­нә дип азмы-күпме җыелган акчасын шул чишмәне торгызуга тотарга ният кылды, бер истәлегем булыр, дип тә уйлады булса кирәк. Хаҗ кылырлык (анысы да насыйп булсын), яисә бөтен Та­тарстанга танылган ме­­ценат Галимҗан ага кебек ятимнәргә автобуслар алып бирерлек маясы юк-югын, ә чишмәгә җитәргә тиеш. Тәвәккәл таш яра, диләр, бу очракта да шулай булды. Тирә-юньне чистартудан башланган изге гамәл, чишмәдән су килгән урынга түгәрәк бетон кольцолар, елга аша басма, матур корылмага ярымай урнаштыру бе­лән төгәлләнде. Чишмәне кулланышка тапшыру кө­не истә калырлык узды. Авыл халкы, тәм-томнар пешереп, чишмә буенда өстәл корды, яше-карты шунда килде, мәчет картлары ясин чыкты, чәй эч­те, сыйланды. Көн әйлә­нә­сендә дүрт самовар кайнап торды, авыл хатыннары, өстәлне оештыручылар, мәчеттә белем алучы балалар җыелды, Коръән сүрәләре укылды. Чишмә ачу үзе бер зур тантанага әверелде, чит­тә яшәүче авылдашлар да кайткан иде.

Бу хәбәрне редакциягә хәбәрчебез Фидания Камалова җиткергән иде ин­де, шушы көннәрдә Ман­­сур абый үзе дә килеп, "район башлыгы­быз­га, авылдашларыбызга ярдәмнәре өчен рәхмәт белдерик әле" дигән гозер белән мөрәҗәгать ит­кәч, без аның теләген ки­ре кага алмадык. Изге гамәл кылучыларны зурлый торган мөбарәк Рамазан аенда матур эшләр хакында язасы килеп кенә тора бит. Чишмә корылмасы өстен­дә ялтырап торучы ярым ай, иминлек, татулык билгесе булып, тирә-юньгә нурын сибеп торсын ди­гән те­ләктә калабыз.